«Qazaq ádebıeti, Qazaqstan tarıhy jáne geografııa pánderi negizinde ár ólkeniń ádebıeti, tarıhy, qaıtalanbas tabıǵaty mektepte oqytylyp, oqýshylardyń bilimi shyńdalyp, baǵalanýy tıis. Al fakýltatıvtik sabaqtar esebinen júrgiziletin tanymdyq ekskýrsııalar men murajaılarǵa, tarıhı eskertkishterge saıahattar teorııalyq bilimdi tolyqtyrý úshin ǵana qoldanylýy kerek», deıdi «Nur Otan» partııasynyń hatshysy Qanybek Jumashev. Árıne, ol tapsyrmany oryndaýda, eń aldymen, turyp jatqan mekenindegi tarıhı tulǵalardy zerttep, olar týraly kitaptar jazyp shyǵarýǵa, murajaı ashýǵa,t.b. sharalardy ótkizýge bolady.
Osy oraıda aıta ketetin jaıt, jańa oqý jylynda Aqmola oblysy, Qorǵaljyn eldi mekenindegi mektep-gımnazııada uly Muhtar Áýezovtiń talantty shákirti «Jan tynysy» (2017), «Arman asýynda» (2015) deıtin kitaptardyń avtory Ermek Bijkenov atyndaǵy qazaq tili jáne qazaq ádebıeti dárishanasy ashylǵan bolatyn.
Saltanatty ashylý rásimine Qorǵaljyn aýdanynyń jáne aýdandyq bilim bóliminiń basshylary, eńbek ardagerleri, aýyl qarttary, muǵalimder, oqýshylar jáne L.N.Gýmılev atyndaǵy Eýrazııa ulttyq ýnıversıtetiniń birqatar ǵalymdary qatysty. Oqytý bólmesi kúrdeli jóndeýden ótip, oqý prosesine qajetti quraldarmen joǵary deńgeıde jabdyqtalǵan.
Ermek Bijkenov – Qorǵaljynnyń damýyna kóp úles qosyp, eńbegi sińgen qoǵam qaıratkeri. Ol jasynan óte zerek, daryndy, talapty azamat bolǵan. Mektepte úlgerimi óte jaqsy bolyp, 4-5 synypty bir jylda bitiredi de, 16 jasynda aıaqtap shyǵady. Almaty qalasynda S.M.Kırov atyndaǵy QazMÝ-diń fılologııa fakýltetine túsedi. Bunda da úzdik oqyp, Stalın stıpendııasynyń ıegeri, komsomol kóshbasshysy atanady. Oqýyn bitirisimen týǵan óńirine oralyp halyqqa qyzmet etedi. Aýdan mektepterin alǵa tartyp, dırektor qyzmetin de atqardy, kezinde partkom hatshysy boldy.
Ermek Baltabaıuly óte ádil, shynshyl, qazaq tilin, orys tilin, arab tilin jetik meńgergen jan bolǵan. Alaıda ómirdiń zańyna qarsy tura almaı, nebary 51 jasynda dúnıeden ozdy. Osy jáne basqa málimetterdi dárishanaǵa qoıylǵan qujattardan bilýge bolady. Bul kisiniń ómiriniń ózi – jas urpaqqa tereń sabaq.
Oqý jyly da bastalyp ketti. Jańa dárishanada birinshi sabaqtar júrgizilip jatyr. Qorǵaljyn aýylynyń ólketaný sabaqtarynyń bastapqy qadamy oqýshylarǵa bilim alýda úlken septigin tıgizýde.
Bul dárishanada oqýshylardyń oqýǵa degen yntasy men qyzyǵýshylyǵy arta túsýi sózsiz. Tarıhı oqıǵaǵa aınalǵan is-shara tek Qorǵaljyn mektep-gımnazııasyn ǵana emes, kúlli Qorǵaljyn turǵyndaryn qýanyshqa bóledi.
Mine, osyndaı ıgi is arqyly apa-aǵalarymyzdan úlgi alyp, týǵan elge, týǵan jerge, Otanymyzǵa degen patrıottyq sezimdi oıata alamyz. El bolyp, jurt bolyp birge birigip jumys atqarsaq, alǵa qoıǵan maqsattar men josparlardy júzege asyryp, damyǵan 30 eldiń qataryna qosylatynymyzǵa senemiz. Qazaqstan – tuǵyry bıik, maqsaty anyq, bolashaǵy jarqyn el!
Baıan JÚSIPOVA,
Qorǵaljyn ortalyq mektep-gımnazııasy dırektorynyń orynbasary
Aqmola oblysy
