Aımaq ákimdiginen habarlaǵandaı, Kárim Kókirekbaev atalǵan kompanııanyń atqarýshy dırektory Hýan Shýn Kın jáne «Higer Quazar» óndiristik kesheniniń ókilderimen kezdesip, «Jasyl ekonomıka» baǵdarlamasy aıasynda ekologııalyq turǵydan zııan keltirmeıtin qoǵamdyq kóliktiń tıimdiligin talqylady.
Sondaı-aq, qala aralyq jáne qala ishilik qoǵamdyq kólikterdi satyp alý, «Quazar» atty elektrlik avtobýstar qurastyratyn zaýyt qurylysyn Taraz qalasynda bastaý jaılary da qaraldy.
Eske sala ketsek, qos tarap jylyna 300 elektrlik avtobýs shyǵaratyn zaýyttyń qurylysyn «Taraz» ındýstrıaldy parki» aýmaǵynda soǵý týraly memorandýmǵa qol qoıǵan bolatyn. Jobanyń quny 3 mlrd. teńgeni quraıdy. Taraptar arasyndaǵy yntymaqtastyqtyń maqsaty - ınvestısııalyq jobany iske asyrý bolyp tabylady. Jambyldyq delegasııa qos qala arasynda kólik menedjmenti boıynsha tájirıbe almasýdy turaqty ornatýǵa qyzyǵýshylyq tanytty.
Sonymen qatar, ekonomıkalyq saladaǵy yntymaqtastyqty keńeıtýge baǵyttalǵan basqa da birqatar baǵyttar boıynsha pikirler tyńdaldy.
Aıta keterligi, bıylǵy jyldyń basynda Almaty qalasynda «Higer Quazar» ekologııalyq taza elektr avtobýstaryn shyǵaratyn zaýyt paıdalanýǵa berilgen bolatyn. «Higer Quazar» kompanııasy eki túrli elektrli avtobýstardy qurastyrady.
Al, Astanada «EKSPO-2017» Halyqaralyq mamandandyrylǵan kórmesi kezinde «Higer Quazar» qazaqstandyq elektrobýs alǵash ret qala kóshelerimen júrgen bolatyn.
Eske sala ketsek, Tarazda ekologııalyq taza qoǵamdyq kólikti iske qosý, sondaı-aq qazaqstandyq qondyrǵylardyń elektromobılderine arnalǵan akkýmýlıatorlyq batareıalar óndirisin ashý josparlanyp otyr.
