«Naryq zamanynda básekege qabiletti bıznes pen onda qyzmet etetin bilikti mamandar ǵana suranysqa ıe. Bul rette bıznes pen bılik arasyndaǵy altyn kópirge aınalǵan Kásipkerler palatasy qos tarapqa da qolaıly jaǵdaı jasaýdyń jolyn qarastyryp, Palatada «Oqý ortalyqtarynyń oblystyq Reestri» qurylǵan bolatyn», – deıdi Jambyl oblysynyń kásipkerler palatasynyń adamı kapıtaldy damytý bóliminiń basshysy Gúlmıra Myrza-Ǵalı.
2017 jylǵy 4 shildedegi «Atameken» Ulttyq kásipkerler palatasy tehnıkalyq jáne qyzmet kórsetý mamandyqtary úshin kásiptik daıarlaý, qaıta daıarlaý, biliktiligin arttyrý jáne biliktilikti berý boıynsha oqý ortalyqtarynyń Reestrlerin qurý týraly buıryǵyna sáıkes qurylǵan Tizilimge óńirde kásiporyndar janynan ashylyp, jumys júrgizip jatqan 4 oqý ortalyǵy endi. Olar «Qazfosfat» JShS fosfor zaýyty, «Qazfosfat» Mıneraldy tyńaıtqyshtar» zaýyty, «Elba» JShS men «Intensıv-Bilim» Qordaılyq qosymsha bilim berý ortalyǵy» JShS. Al, búgin tizilim qatary jeńil ónerkásip salasyndaǵy «Dana Del» tigin úıiniń janynan ashylǵan oqytý ortalyǵymen tolyǵyp otyr. Atalmysh oqytý ornyn tikeleı Kásipkerler palatasynyń tól týyndysy dep aıtýǵa tolyq negiz bar. Elimizde jeńil ónerkásip, aıqyndap aıtqanda, toqyma ónerkásibi, tigin tigý men qazaqy naqyshtaǵy kıim keshekterdi dúnıege ákelý tutynýshylar tarapynan úlken suranysqa ıe bolyp otyr. Otandyq ónimdi ishki naryqta ilgeriletý úshin atalǵan salaǵa bilikti mamandar qajet. Kásipkerler palatasymen tusaýy kesilgen «Dana del» tigin úıi ózin-ózi jumyspen qamtyp, óz kásibin dóńgeletem deýshilerge kásibı kómek kórsetýge, kásibı biliktiligin arttyrýǵa, tigin-tigýdiń qyr-syryn meńgertýge baǵyttalǵan.
Basty maqsat – óńirdegi jumyssyzdyq deńgeıin tómendetý. Ortalyqta mamandardy kásiptik daıarlyqtan, qaıta daıarlaý men sanattyq biliktiligin arttyrý boıynsha qysqa merzimdi úsh aılyq oqytý kýrstary qarastyrylǵan. Kólemi 600 sharshy metrdi quraıtyn tigin ortalyǵynyń esigi qalanyń, oblystyń kez kelgen turǵyny úshin ashyq.
Tigin tigýdiń, oıyp-pishýdiń qyr-syryn meńgerem deýshilerge barlyq jaǵdaı qarastyrylǵan. 15 jyl boıy jeńil ónerkásip naryǵynda ózindik ornyn qalyptastyryp, talaı bıik belesterdi baǵyndyryp, jeke brendin qalyptastyra bilgen bıznesvýmen Baqyt Toqtybaeva, endigi kezekte qyz-kelinshekterdiń tigin isin meńgerip, óz kásibin ashyp shyńdalýyna yqpal etkisi keletinin aıtty.
«Nátıjeli jumyspen qamtý jáne jappaı kásipkerlikti damytýdyń» 2017-2021 jyldarǵa arnalǵan baǵdarlamasyn júzege asyrýda Jambyl oblysynyń Kásipkerler palatasy Oqý ortalyqtary Reestrine «Dana Del» oqý ortalyǵynyń enýi qýantarlyq. Biz Palata tarapynan qoıylǵan talaptarǵa saı tigin sheberhanasyn zamanaýı qurylǵylarmen jabdyqtaýǵa tyrysyp baqtyq. 20 tigin mashınasy ornalastyrylǵan eki oqytý bólimi bar, metodıkalyq synyptar men ortalyqtyń óz jeke kitaphanasy da qarastyrylǵan. Bilim beretin pedagogıkalyq quram da osy salany jetik meńgergen maman ıelerinen turady. Qysqa merzimdi kýrstar birneshe aýysymmen oqytylady. Oqytý syıymdylyǵy bir lekte 25-30 adamǵa deıin».
Baqyt Egemberdiqyzynyń aıtýynsha, endi oqytý bazasynda esimderi búkil respýblıkaǵa belgili «Asyl-Dızaın» sán úıiniń dırektory Aıdarhan Qalıev, qazaqtyń ulttyq kıimderin tigýmen aınalysatyn áıgili dızaıner Irına Naboko syndy sheber ıeleriniń qatysýymen aı saıyn jas tiginshilerge arnap sheberlik synybyn ótkizýdi nıet etip otyr. Ashylý saltanatynda kóbine názikjandy kásipkerler, jergilikti atqarýshy organdarmen men qatar jumyspen qamtý ortalyǵynyń ókilderi jyly lebizderin bildirip, aldaǵy ýaqytta tyǵyz áriptestik qarym-qatynasty bekitýdi kózdeıtinderin jetkizdi.
