Kentti aýyz sýmen qamtý máselesin Qaraǵandy oblysynyń ákimi Erlan Qoshanov qatań baqylaýǵa aldy. Búgingi tańda bul máseleni eń tıimdi jolmen sheshý tásili tabylyp otyr. Geologtar jer astyndaǵy sýǵa barlaý jasap, oń nátıjege qol jetkizgen. Sýmen qamtý máselesi kelesi jyly turaqtalýy tıis.
Erlan Qoshanov Saıaq kentinde bolyp, atqarylyp jatqan jumystarmen tanysyp qaıtty. Aımaq basshysy sapar barysynda turǵyndarmen de kezdesti.
Kentte jer asty sýlarynyń qoryn zertteý maqsatynda izdeý-barlaý jumystary júrgizilýde. Joba boıynsha tereńdigi 200 metr 20 uńǵyma qazylýy tıis.
«Azımýt geologııa» JShS merdiger uıymy 14 uńǵyma qazdy, onyń segizinde sý tabyldy, – dep málimdedi oblys ákiminiń orynbasary Anatolıı Shkarýpa kent turǵyndarymen ótken kezdesý barysynda. – Biz búgin sonyń bireýine baryp qaıttyq. Ol uńǵymadaǵy sý qory sekýndyna 5 lıtrdi quraıdy, ol degenimiz táýligine 432 tekshe metr. Bul kentke qajetti kólemniń jartysyna teń. Búgingi tańda qazylǵan 8 uńǵymada sekýndyna 10,6 lıtr sý shyǵatyny rastalǵan. Ol Saıaq kentin aýyz sýmen qamtýǵa jetkilikti.
Oblys ákimi uńǵymadan shyqqan sýdyń dámin tatyp, paıdalanýǵa keletinin tekserip kórdi.
– Men jańa ózim sol uńǵymadan shyqqan sýdan iship kórdim. Shynymdy aıtsam, balalyq shaǵym esime túsip ketti. Kezinde bizdiń qudyqtan alyp ishken sýymyzdy eske saldy. Sál ashylaý, biraq biz onyń sapasyn jaqsartý úshin tazartý qurylystaryn salatyn bolamyz. Barlyq nysandardyń qurylysyna kelesi jyly 1 mlrd teńge qarastyramyz. Eń bastysy, jer qoınaýy memlekettik komıssııasynyń quptaýy. Sol sheshimge barlyǵy baılanysty bolyp tur, – dedi Erlan Qoshanov.
Prosedýralyq jaıttar birneshe aıǵa sozylady. Memlekettik komıssııanyń sheshimi kelesi jyldyń jazynda shyǵady dep boljam jasalyp otyr.
Alaıda bılik basyndaǵylar qol qýsyryp otyrǵan joq. Bıylǵy jyly oblystyq bıýdjetten qazirgi tańda jumys istep turǵan negizgi sý taratqyshty jóndeý maqsatynda 232 mln teńge bólingen. Merdigerler sý taratý qurylysynyń torabyn jóndeýge kirisken.
Jınalys barysynda turǵyndar nelikten Keńes ókimeti kezinde osylaı uńǵyma qazýdyń ornyna, Balqashtan qubyrlar tartylǵanyn surady. Búgingi kúni tańdalyp otyrǵan tásil anaǵurlym tıimdi jáne de shyǵyny da azyraq dep sendirdi mamandar. Eger jańadan sý qubyrlaryn Balqashtan tartar bolsa, oǵan shamamen 3 mlrd teńge qajet bolady.
– Keńestik kezde geologııalyq barlaý kompanııalarynda qazirgideı jaǵdaı men qajetti qurylǵylar bolmaǵan. Eń kóp degende olar 60 metrge deıin ǵana uńǵyma qazyp, sol tereńdikte jerdiń astynan sý taba almaǵan. Sondyqtan Balqash qalasynan qubyr tartýǵa májbúr bolǵan. Qazir biz 200 metrge deıin tereńdedik, sý tabyldy, – dep túsindirdi «Azımýt geologııa» JShS ınjenerlik-ekologııalyq bólimniń bastyǵy Natalıa Kostıkova.
Aýyl turǵyndary kezdesý barysynda ózge de ózekti problemalarymen bólisti. Olardyń qatarynda mektepti, joldardy jóndeý, temir jol qatynasy, kentti abattandyrý máseleleri bar. Erlan Qoshanov bul máseleler boıynsha tapsyrmalar berdi. Al «Qazaqmys» korporasııasynyń basshylyǵy bolsa, eldi mekendegi qoqysty shyǵarý máselesin sheship, oıyn alańdaryn salyp berýge ýáde berdi.
Mıras ASAN,
«Egemen Qazaqstan»
Qaraǵandy oblysy
Sýretti túsirgen
Dmıtrıı KÝZMIChEV
