Oǵan álemniń alys-jaqyndaǵy jıyrma elinen bir kezde Aqtóbe aımaǵynda týyp-ósken, alaıda ózge óńirlerge kóship ketken, tipti taǵdyrdyń jazýymen búgingi kúnderi jer sharynyń ózge qurlyqtarynda turyp jatqan 300-ge jýyq jerlesterimiz keledi dep kútiledi. Baspasózde Memleket basshysynyń rýhanı jańǵyrý jónindegi keń tynysty, kemel oı-pikirleri jarııalanǵannan keıin Aqtóbe oblysynda dereý «Týǵan jer» baǵdarlamasyn iske asyrý tetikteri, ony júzege asyrýdyń búgingi taktıkasy men erteńgi strategııasy belgilengen bolatyn. Búgingi kúni Aqtóbede ázirlengen bul baıypty baǵdarlama ózge óńirler ónege, taǵylym alarlyqtaı deńgeıge jetip otyr.
Sondyqtan da «Týǵan jer» tuńǵysh respýblıkalyq forýmy kezinde respýblıkamyzdyń barlyq oblystarynan kelgen delegasııalar rýhanı jańǵyrý sheńberindegi osy bazalyq baǵdarlamanyń qyzmetimen tanyspaq. Forýmnyń ashylý saltanaty respýblıka oblystary arasynda balamasy joq jańadan boı kótergen shyǵarmashylyq akademııada ótedi dep belgilengen. Budan keıingi kezekte forým qonaqtary óńirde bıznestiń áleýmettik jaýapkershiligi jáne memleket-jekemenshik áriptestigi aıasynda turǵyzylǵan kóptegen nysandardy aralap kórmek.
Forým aıasynda álemdik standarttarǵa saı salynǵan jekpe-jek saraıynda dzıýdodan respýblıka Prezıdentiniń kýbogi úshin halyqaralyq jarys uıymdastyrylmaq. Sonymen birge «Týǵan jer» baǵdarlamasyna sáıkes «Aqtóbe keshe, búgin jáne erteń» atty konferensııa ótkizý josparlanǵan. Forýmnyń sońǵy kúni oǵan qatysýshylardyń bir bóligi oblys aýdandaryna jol tartsa, ekinshi bir legi oblys ortalyǵyndaǵy bilim berý, densaýlyq saqtaý jáne mádenıet mekemelerinde semınarlar men sheberlik saǵattaryn ótkizbek. Memleket basshysy Nrsultan Nazarbaev atap kórsetkendeı, týǵan jerge, onyń mádenıeti men salt-dástúrlerine aıyryqsha ińkárlikpen atsalysý – shynaıy patrıotızmniń basty belgisi. Aqtóbede «Rýhanı jańǵyrý» baǵdarlamasy aıasynda ótkiziletin «Týǵan jer» tuńǵysh respýblıkalyq forýmynda týǵan jerdiń mereıin asqaqtatar ister molynan kórinis tabady degen senim mol.
AQTО́BE
