Uzaqbaı Qaramanov 1937 jyly 29 tamyzda Qyzylorda oblysyndaǵy Aral aýdanynyń Uıaly aýylynda týǵan. 1959 jyly A.I.Mıkoıan atyndaǵy Kýıbyshev ınjenerlik qurylys ınstıtýtyn támamdap, 1961 jyly KSRO Sáýlet jáne qurylys akademııasy janyndaǵy Joǵary ınjenerlik kýrstyń tyńdaýshysy boldy.
Eńbek jolyn 1959 jyly Aqtóbe oblavtotresiniń Shubar qudyq avtobazasynda prorab retinde bastap, 1961 − 1964 jyldary «Qyzylordaqurylys» tresiniń óndiristik-tehnıkalyq bóliminiń aǵa ınjeneri, Aral qalasynda qurylys basqarmasynyń bastyǵy bolyp eńbek etti. 1965 – 1980 jyldary «Almatyónerkásipqurylys» mekemesinde, «BasAlmatyQurylys» Qazaq KSR Aýyr ındýstrııa kásiporyndary qurylysy mınıstrliginiń Bas basqarmasynda basshylyq qyzmetter atqardy.
1980 – 1986 jyldary Qazaq KSR jeńil ónerkásip mınıstriniń orynbasary, Qazaq KSR qurylys mınıstriniń birinshi orynbasary laýazymdaryn atqardy. 1987 jylǵy sáýirde Qazaq KSR materıaldyq-tehnıkalyq jabdyqtaý memlekettik komıtetiniń tóraǵasy boldy.
1989 jylǵy shildede Uzaqbaı Qaramanov Qazaq KSR Mınıstrler Keńesiniń Tóraǵasy, 1990 jylǵy qarashada Qazaq KSR-iniń Premer-Mınıstri bolyp taǵaıyndaldy.
Uzaqbaı Qaramanov Qazaq KSR Joǵarǵy Keńesiniń XII, XIII shaqyrylymdarynyń, ekinshi shaqyrylymdaǵy (1999-2004 jyldar) jáne úshinshi shaqyrylymdaǵy (2004-2007 jyldar) Qazaqstan Respýblıkasy Parlamenti Májilisiniń depýtaty bolyp saılandy.
Uzaqbaı Qaramanov II dárejeli «Barys», Eńbek Qyzyl Tý ordenderimen jáne kóptegen medaldarmen, qurmetti ataqtarmen marapattalǵan.
Uzaqbaı Qaramanov qazirgi Qazaqstannyń qalyptasýyna, respýblıkanyń qurylys salasynyń damýyna eleýli úles qosty. Ol óz eliniń shynaıy patrıoty, bilikti basshy jáne joǵary deńgeıdegi kásibı maman boldy.
Uzaqbaı Qaramanovtyń jarqyn beınesi bizdiń júregimizde árdaıym saqtalady.
Qazaqstan Respýblıkasynyń Úkimeti
