Akademııa basshysy Darhan Qydyráliniń tóraǵalyǵymen ótken jıynda «Ortaq túrki tarıhy» maquldandy. Arnaıy jumys tobyna kirgen mamandar Akademııada 3 kún boıy oqýlyqtyń jobasyn jan-jaqty talqylap, qajetti túzetýler engizip, mazmunyn tolyqtyrdy. Sarapshylar Túrki tildes memleketterdiń Bilim mınıstrleriniń IV jıynynda qabyldanǵan sheshimderdi negizge aldy.
Otyrysta Darhan Qydyráli túrki halyqtaryna jańa tarıh kitabyn jasaýǵa at salysqan sarapshylarǵa alǵysyn bildirdi.
«Búgingi otyrysta irgeli máseleni oryndadyq. Úsh kúndik jumys barysynda Akademııaǵa múshe elderden kelgen ókilder kitaptyń árbir sózin talqylap, ortaq kitap jasap shyqty», ‒ dedi Akademııa prezıdenti D.Qydyráli.
Ejelgi túrki halyqtarynyń XV ǵasyrǵa deıingi tarıhyn qamtyǵan oqýlyq 7 bólimnen turady. Onda túbi bir túrki halyqtarynyń egjeı-tegjeıli tarıhy qamtylǵan. Jańa tarıh kitaby 8-synyp oqýshylaryna oqytylmaq. Oqýlyqtyń jobasy 2018 jyly Qyrǵyzstanda ótetin Túrki keńesi memleketteri basshylarynyń VI Sammıtinde usynylady.
Aıta ketý kerek, talqylaýǵa Túrki keńesine múshe memleketter – Ázerbaıjan, Qazaqstan, Qyrǵyzstan men Túrkııanyń Bilim jáne ǵylym mınıstrlikteriniń ókilderi, Túrki keńesi men Halyqaralyq Túrki akademııasynyń sarapshylary, sondaı-aq tarıhshy ǵalymdar qatysty.
Jumys toby talqylaýdyń qorytyndysy boıynsha arnaıy Hattama qabyldady. Jıynǵa qatysýshylar Túrki Akademııasynyń jumysyn joǵary baǵalady.
