Dańǵaıyr dıqan, mehanızator, Sosıalıstik Eńbek Eri, Memlekettik syılyqtyń laýreaty, birneshe ordenderdiń ıegeri Kámshat Dónenbaevanyń esimi kezinde tek Qazaqstan ǵana emes, odan da tys jerlerge málim boldy. Kámshat qazaq halqynyń maqtanyshyna, jastardyń úlgi tutar tulǵasyna aınaldy.
– Kámshat apa týraly kezinde jýrnalıster ocherkter, Farıza apamyz kitap ta jazdy, derekti fılmder túsirildi, aqyndar óleńin arnady. Biraq án jazyla qoımaǵan eken. Osy olqylyqtyń ornyn toltyrý kópten oıymda júretin. Sol maqsatyma jetkendeımin, – dedi ánniń avtory. «Qazaqtyń Kámshaty» ánin kókshelik ánshi Rashıda Ǵalymova oryndady. Ekinshi ánin avtor kórermenderge ózi tartý etti.
Búginde jetpistiń úsheýine kelip, nemereleriniń ortasynda júrip jatqan Kámshat apanyń ónegeli ómiri jastarǵa úlken úlgi.
– Kókshelik ónerpazdardyń Qostanaıǵa bul jolǵy sapary bizdiń otbasymyzǵa da erekshe qýanysh syılady. Bizdiń anamyzǵa arnalǵan bir emes, eki ánniń tusaýy kesildi. Anamyzdyń qýanyshyn, ánniń avtoryna, oryndaýshysyna aıtqan alǵysyn kórermenderge jetkizgim keledi,–dedi Kámshat apanyń kelini Aqmaral Dónenbaeva.
Oblystyq mádenıet basqarmasy basshysynyń orynbasary Roza Oljabaeva jaqsy ánniń el ıgiligi ekenin aıta kelip, Kámshat Dónenbaeva týraly jańa án aldaǵy ýaqytta jastarǵa arnalǵan sharalarda oryndalatynyn, qostanaılyq ánshilerdiń de repertýarynan oryn alatynyn aıtty.
Názıra JÁRIMBET,
«Egemen Qazaqstan»
QOSTANAI
