17 qyrkúıekte jalaýy jelbiregen baıraqty básekege Azııanyń 62 elinen kelgen 6000-ǵa jýyq sportshy sporttyń 21 túri boıynsha synǵa tústi. Al Qazaqstan qurama sapynan 16 sport túri boıynsha 181 sportshy el namysyn qorǵaǵan. Jarystyń ashylý saltanatyna qurmetti qonaq retinde memleket basshylary, bedeldi saıasatkerler, halyqaralyq uıymdardyń jetekshileri qatysty. Olardyń qatarynda Qazaqstan Respýblıkasynyń Prezıdenti Nursultan Nazarbaev ta bolǵan edi.
On eki kúnge sozylǵan V Azııa oıyndarynyń qorytyndysy boıynsha 181 sportshymyz 28 altyn, 28 kúmis jáne 40 qola júlde ıelendi. Jalpykomandalyq esepte 96 medal jıyntyǵyna qol jetkizgen bizdiń sportshylar tórtinshi orynǵa turaqtady. Bul synda Túrikmenstan sportshylary birinshi boldy. Jarysty ótkizýshi el qorjynynda 245 medal bar (89 altyn, 70 kúmis jáne 86 qola). Qytaı quramasy 97 júldemen (42, 32, 23) ekinshi orynǵa ornalasty. Al úshinshi satyǵa taban tiregen Iran Islam Respýblıkasy sportshylarynyń qorjynynda 118 medal bar (36, 23, 59).
Jabyq ǵımarattaǵy jáne jaýyngerlik óner boıynsha V Azııa oıyndarynda el qorjynyna eń kóp medaldy samboshylar saldy – 19 júlde. Onyń jeteýi altyn, altaýy kúmis jáne altaýy qola. 13 medal jınaǵan belbeý kúresiniń balýandary ekinshi orynda. Olardyń enshisinde tórt altyn, úsh kúmis jáne alty qola bar. Sondaı-aq bıylǵy Azııa oıyndarynda jeńil atletterimiz de sátti óner kórsetti. «Sport padıshasy» sanalǵan sport túrinen jerlesterimiz alty altyn, bir kúmis jáne úsh qolamen jalpy sany 10 medal jınady.
Jabyq ǵımarattaǵy jáne jaýyngerlik óner boıynsha Azııa oıyndary 2005 jyldan beri turaqty túrde uıymdastyrylyp keledi. Bıylǵy jaryspen qosa eseptegende Qazaqstan quramasynyń sportshylary mundaı saıysqa besinshi ret qatysty. Osy aralyqta bizdiń sportshylar jalpy sany – 363 medal ıelengen eken. 2005 jyly tuńǵysh ret uıymdastyrylǵan atalǵan týrnırde bizdiń eldiń sportshylary 23 altyn, 15 kúmis jáne 6 qola medal ıelengen bolatyn. Jalpy sany 44 júldemen medal kórsetkishi boıynsha jalpykomandalyq esepte ekinshi oryn alǵan.
Araǵa eki jyl salyp jabyq ǵımarattaǵy jáne jaýyngerlik ónerden Azııa oıyndary Qytaıdyń arnaıy ákimshilik aýdany sanalǵan Makao qalasynda ótti. Bul dodaǵa Azııanyń 44 elinen kelgen 1800-ge jýyq sportshy sporttyń 17 túrinen óz baqtaryn synady. Qazaqstan quramasynyń sportshylary bul synda medal boıynsha eki jyl burynǵy nátıjesin qaıtalaı almady. Sportshylarymyz Makaoda toǵyz altyn, 20 kúmis jáne 13 medalmen jalpykomandalyq esepte úzdik bestikke endi.
Vetnamda ótken úshinshi Azııa oıyndarynda qazaqstandyq sportshylar sporttyń 10 túrinen qurama qorjynyna 59 júlde salǵan bolatyn. Jalpy esep boıynsha Qazaqstan quramasy 21 altyn, 16 kúmis jáne 22 qola medal enshiledi. Medal jıyntyǵy boıynsha úshinshi satydan kórindi.
Al IV Azııa oıyndary 2013 jyly Ońtústik Koreıanyń Inchhon qalasynda ótip, bir aptaǵa sozylǵan básekede qazaqstandyq sportshylar 31 medalǵa qol jetkizdi. Onyń jeteýi altyn, segizi kúmis jáne 16-sy qola. Jalpykomandalyq esepte besinshi oryndy qanaǵat tutqan bolatyn.
Jabyq ǵımarattaǵy jáne jaýyngerlik ónerden kelesi Azııa oıyndary 2021 jylǵa josparlanǵan. Biraq naqty qaı el ótkizetindigi týraly málimetter joq. Jarysty uıymdastyrýshylardyń málimdeýinshe, VI Azııa oıyndaryn ótkizýshi eldiń aty jyl sońyna deıin belgili bolmaq.
Álı BITО́RE,
«Egemen Qazaqstan»
