Sharaǵa Joǵarǵy sot janyndaǵy Sottardyń qyzmetin qamtamasyz etý jónindegi departament basshysy Nurserik Sháripov pen Joǵarǵy sottyń BAQ-pen jumys jónindegi úılestirýshi sýdıasy Elena Maksıýta qatysty.
«Biz búgingi tańda elektrondy sot tóreligi sot isin júrgizýdi jeńildetýge, onyń jedeldigin, qoljetimdiligi men ashyqtyǵyn qamtamasyz etýge baǵyttalǵan tyń bastamalardy qolǵa alýdamyz. Onyń nátıjesinde saladaǵy qyzmettiń barlyǵy da turǵyndardyń sot júıesine degen senim deńgeıiniń ósýine negiz bolyp tabylady», dedi ortalyqtyń ashylý saltanatynda sóz alǵan N.Sháripov.
Aıta keteıik, Ahýaldyq ortalyq alańynda aýdıobeınetirkeý (ABT) júıesi men beınebaılanys júrgizý múmkindikteri qoljetimdi.
Sonymen qatar búgingi tańda Ult josparynyń 20-qadamyn oryndaý maqsatynda elimizdegi barlyq sot zaldary (1 418 zal) ABT júıesimen tolyq jaraqtandyrylǵanyn atap ótken jón. Osylaısha, sot otyrystarynyń 98 paıyzy ABT júıesin qoldana otyryp júrgiziledi. Sol sııaqty sottar jumysyna elektrondy hattama da engizilgenin eskerte keteıik.
Jańa ortalyq jumysyn tanystyrý aıasynda sot salasynyń mamandary Qylmystyq-atqarý júıesi komıtetiniń mekemelerimen jáne ýaqytsha ustaý abaqtysymen tikeleı beınebaılanysqa shyqty. Mundaı ádispen bıyldyń ózinde 9 589 materıal qaralǵan. Sondaı-aq qajettilik bolǵan jaǵdaıda kez kelgen sot otyrysynyń qatysýshysy ózine jaqyn turǵan sotqa barý arqyly sot prosesine qashyqtyqtan qatysý múmkindigin paıdalana alady eken. Jyl basynan beri elimizdegi sot qyzmetinde Mobıldi sot kabıneti iske qosylǵany belgili. Endigi jerde taraptardyń qaısybiri sotqa kelmese de bolady. Iаǵnı, sot prosesine ınternetke qosylǵan mobıldik qurylǵy arqyly shetelde júrip te qatysyp, suraq qoıyp, jaýap ala alasyń degen sóz. Ahýaldyq ortalyqtyń artyqshylyǵy da osyǵan uqsas. Bul onlaın rejimde táýlik boıy ózekti sot aqparatyn jınaý men taldaýǵa múmkindik beretin sottar qyzmetine monıtorıng júrgizýdiń biryńǵaı júıesi. Joǵarǵy sottyń árbir qyzmetkeri osy ortalyq arqyly jumys prosesindegi yqtımal irkilisterdi kórip, olardy jedel túrde túzetý boıynsha sharalar qabyldaı alady. Iаǵnı, 370 jergilikti sottyń jumysyn ortalyqtaǵy 700 kórsetkish boıynsha baqylaý múmkindigi týdy. Al ortalyqqa kelip túsetin aqparattyq is qaǵazdar men sot isin júrgizý, «Tórelik» júıesiniń quramdas bólikterine monıtorıng júrgizý syndy sharýalar 4 blokqa bóliný arqyly júzege asyrylady.
Onyń birinshisi – respýblıkadaǵy barlyq sottar keńseleriniń jańa hat-habarlaryn tirkeý, ister men materıaldardy avtomatty túrde bólý jumysyn qadaǵalasa, ekinshisi – «Tórelik» júıesiniń barlyq serverlik quramdas bólikteriniń jumys isteý múmkindikterin baqylaıdy. Bul júıe 25-ten astam kórsetkishten turady jáne belgilengen parametrlerden aýytqýshylyqtarǵa jedel túrde den qoıýǵa, olardyń jumysyn turaqtandyrý boıynsha qajetti sharalardy qabyldaýǵa múmkindik beredi. Úshinshi blok kıberqaýipterge der kezinde den qoıady jáne olardyń bolashaqta paıda bolý yqtımaldyǵyn joıady. Sońǵy blok respýblıkadaǵy barlyq sot otyrysy zaldaryndaǵy ahýaldy jedel qadaǵalaıdy.
Nurlybek DOSYBAI,
«Egemen Qazaqstan»
