Qazir Aqsý qant zaýytynda qyzý naýqan qarqyn aldy. Qyzylshanyń alǵashqy legi ótkizilip jatyr. Alǵashqy qyzylsha qabyldaý saltanatty túrde atalyp ótti. Almaty oblysy ákiminiń orynbasary Serikjan Beskempirov Aqsý qant zaýytyna arnaıy baryp, tátti túbir ótkizýdi bastap ketken kópshilikti quttyqtady.
– Osydan on jyl buryn jumysyn toqtatqan qant zaýyty endi bir aıdan soń qaıta iske qosylyp, jumysyn bastaıdy. Sol ýaqytta bul jerde talaı adamnyń jumyspen qamtylýyna jol ashylyp, aýdan tynysy odan ári keńeıetin bolady. Munyń syrtynda mamandar da daıarlandy. Iаǵnı bul óńir ekonomıkasynyń alǵa jyljyp, ósip-órkendeýine aıtarlyqtaı yqpal etedi dep senemiz.
Zaýytqa ónimderin ótkizetin Aqsý jáne Sarqan aýdandarynyń ákimderi Ádilbek Dalbaǵaev pen Erǵazy Qoshanbekov jáne aýyl aqsaqaldary da el qýanyshyn bólisip, qutty bolsyn aıtty. Lenta qıylyp, án-kúı oryndalǵan saltanatty sharadan soń kólikterge tıelgen ónimniń alǵashqy legi qant qyzylshasyn qabyldaý pýnktine engizildi. О́ńir dıqandarynyń qarqyny joǵary. Bastapqy kúnniń ózinde 200 tonnaǵa jýyq qyzylsha qabyldandy. Taıaýdaǵy 3 jylda tek Aqsý qant zaýytyna ákelinetin ónimniń jalpy kólemi 300 myń tonnaǵa jetedi. Aımaq jurtshylyǵy aldaǵy ýaqytta qyzylsha alqabyn odan ári ulǵaıtyp, ónim kólemin arttyrýǵa kúsh jumsamaq. Ákimshilik tarapynan jasalǵan qoldaýdyń arqasynda ashylǵan «Aqsý» bul sharýashylyqty jandandyrýǵa, egistik kólemin ulǵaıtýǵa tolyqtaı múmkindik beredi.
«Aqsý qant zaýyty» jaýapkershiligi shekteýli seriktestigi dırektorynyń mindetin atqarýshy Sáken Muratovtyń aıtýynsha, kóktem aıynan beri eskirgen qurylǵylar túgeldeı qaıta jańartylǵan. Qyzylsha jınaqtaý alańy ǵana emes, barlyq sehtary jumysqa daıyn, jańa qural-jabdyqtar ornatylǵan, barlyq tehnologııalyq prosester avtomattandyrylǵan. Osyndaı jumystardy júzege asyrý úshin búgingi kúnge deıin barlyǵy jeti jarym mıllıard teńge qarajat salynypty. Zaýyttyń merziminen keshiktirilimeı iske qosylýyna barlyq jaǵdaı qarastyrylǵan. Qant qyzylshasyn qabyldap bolǵasyn, zaýyt tolyqtaı iske qosylyp, alǵashqy ónimin shyǵaratyn bolady. Al ázirge, egistik pen zaýyt arasyn qyzylsha ósirýshilerdiń tasymaly jalǵap tur. Bul jol – eń negizgi jol. Arǵy meje berisi respýblıkany qamtamasyz etip, árisi shetelderge eksporttaý. Qazan aıynda jeti júzge jýyq adamdy jumyspen qamtıtyn zaýytta tirshilik qaınap jatyr.
Almas NÚSIP,
«Egemen Qazaqstan»
Almaty oblysy
