Komıssııa otyrysyna Qazaqstan Respýblıkasy bıliginiń zań shyǵarýshy, atqarýshy jáne sot tarmaqtary organdarynyń, halyqaralyq jáne úkimettik emes uıymdardyń, emdeý mekemeleriniń, advokatýranyń ókilderi qatysty. Jıynda densaýlyq saqtaý salasyn damytýdyń 2016-2020 jyldarǵa arnalǵan memlekettik «Densaýlyq» baǵdarlamasyn iske asyrý máseleleri talqylandy. Komıssııa músheleri baǵdarlamanyń iske asyrylýy áleýmettik-baǵdarly ulttyq densaýlyq saqtaý júıesimen halyqty jappaı qamtý, áleýmettik ádildik, sapaly medısınalyq kómekpen qamtamasyz etý qaǵıdattaryn saqtaı otyryp, turaqty ári qarqyndy damytýǵa yqpal etetinin atap ótti. 2016 jyldyń qorytyndysy boıynsha qazaqstandyqtardyń ómir súrý uzaqtyǵy 72,3 jasqa jetken. Sońǵy 10 jyl ishinde ómir súrý uzaqtyǵynyń 6 jylǵa artýy, ólimniń 27 paıyzǵa, ana óliminiń 4 esege tómendeýi baıqalady, sábılerdiń shetineýi 1,6 ese, týberkýlezden qaıtys bolý 5 ese, qaterli isikterden bolatyn ólim 20 paıyzǵa tómendegen.
Barlyq densaýlyq saqtaý qyzmeti medısınalyq-sanıtarlyq alǵashqy kómekti (MSAK) jańǵyrtý jáne basym damytý negizinde halyqtyń qajettilikteri aınalasynda ıntegrasııalanady. Onyń sapasyn jaqsartý úshin «Kezeksiz emhana» qanatqaqty jobasy jáne Dúnıejúzilik bank konsýltanttarymen birlese 5 óńirde Aýrýdy basqarý baǵdarlamasy engizilýde. Mınıstrlik jahandyq básekelestik jaǵdaıynda densaýlyq saqtaý salasyn sıfrlandyrý jáne aqparattandyrý arqyly halyqqa medısınalyq qyzmet kórsetýdiń qoljetimdiligi men sapasyn qamtamasyz etýdi josparlap otyr.
Talqylaýǵa qatysqan sarapshylar bılik pen qoǵamnyń, emdeý mekemeleriniń, medısınalyq qyzmet kórsetýdi jetkizýshiler men halyqtyń birigýi azamattardyń densaýlyǵyn saqtaý men bilikti medısınalyq kómek alýda konstıtýsııalyq quqyqtaryn tolyǵymen iske asyrýǵa múmkindik beretinin atap ótti. Komıssııa otyrysynda tujyrymdalǵan usynymdar Memleket basshysynyń, Parlament pen Úkimet nazaryna jetkiziletin bolady.
Dýman ANASh,
«Egemen Qazaqstan»
