Zilzala kúshi 7 balldan asty

Jeksenbi, 23 qazan kúni Túr­kııa­nyń shyǵysynda qýatty jer silkinisi boldy. Zilzalanyń epı­sentri Van qalasynyń shy­ǵysynan 19 shaqyrymdaı jerde degen boljamdar aıtylýda. Alǵashynda zilzala saldarynan 500-den astam adam qurban bol­dy degen aqparat taratylǵan edi. Keshe bul aqparatty Túr­kııa­nyń ishki ister mınıstri Idrıs Naım teriske shyǵaryp, jer silkinisinen 217 adamnyń opat bolǵanyn málimdedi. 1090 adam jaraqat alǵan. Opat bol­ǵan­dardyń 100-i Van qalasy­nyń, 117-si Van provınsııasyna qarasty Erdjısh aýdanynyń turǵyndary. Qurban bolǵandar qatary óse túsýi múmkin. О́ıtkeni, qu­la­ǵan úılerdiń astynda da adamdar qalyp otyr. Túrkııadaǵy Qyzyl krest bólimshesiniń málimdeýinshe, zil­zala kezinde atal­ǵan aýmaqtar­da arasynda tur­ǵyn úıler men jataqhanalar bar 90-ǵa jýyq ǵımarat qıraǵan. Al zilzalanyń kúshi 7 balldan asqan kórinedi. Birqatar sheteldik buqaralyq aqparat quraldary jer silkinisinen Van provınsııasyndaǵy túrme ǵımaraty da ishinara búlingenin, túrmeden 150-ge jýyq bas bostandyǵynan aıyrylǵan adam qashyp ketkendigin, birneshe saǵattan soń olardyń 50-i túrmege qaıta oralǵandyǵyn jazady. Bul zilzala Túrkııada sońǵy jyldary kórinis bergen asa qýatty jer silkinisi retinde tirkelip otyr. О́ıtkeni, onyń jerasty dúmpýi Iran men Ázerbaıjan aýmaqtarynda, sondaı-aq Grýzııa­nyń Túrkııamen shektesetin aýdan­darynda da kádimgideı sezilgen. Jeksenbide túnge qaraı Túrkııanyń ońtústik-shyǵysyn­da taǵy da jer silkindi. «Reıter» agenttiginiń aqparattary boıynsha, onyń kúshi 6,1 ball bolǵan. Adam ólimine soqtyrǵan zil­zala zardaptaryn joıýǵa baı­lanysty AQSh, Reseı, Uly­brıtanııa, Izraıl, taǵy basqa elder sol kúni-aq resmı Ankaraǵa ózderiniń kómektesýge ázir ekendikterin bildirgen bo­latyn. Ankara Izraıldiń kó­me­ginen bas tartatynyn birden málimdedi.