Ǵarıfolla Qurmanǵalıev atyndaǵy Batys Qazaqstan oblystyq fılarmonııa uıymdastyrǵan bul baıqaýǵa baq synaý úshin elimizdiń ár aımaǵynan úmitkerler kelgen. Konkýrsanttardy Shamǵon Qajyǵalıevtiń jubaıy Jańylsyn Tólepbergenqyzy men Oral qalasynyń ákimi Murat Muqaev qarsy alyp, aq jol tiledi.
Tartysty ótken baıqaýdyń tóreligin quramynda Qazaqstannyń eńbek sińirgen qaıratkeri, professor, Astana qalasyndaǵy memlekettik akademııalyq fılarmonııasy qazaq halyq aspaptary orkestriniń kórkemdik jetekshisi jáne bas dırıjeri Aıtqalı Jaıymov, Qazaqstannyń eńbek sińirgen ártisi Nurǵısa Tilendıev atyndaǵy akademııalyq folklorly-etnografııalyq «Otyrar sazy» orkestriniń dırıjeri Jalǵasbek Begendikov, Qurmanǵazy atyndaǵy memlekettik-akademııalyq qazaq halyq aspaptary orkestriniń bas dırıjeri Arman Júdebaev, Qazaqstannyń eńbek sińirgen qaıratkeri Murat О́skinbaev atyndaǵy Mańǵystaý oblystyq fılarmonııasynyń Abyl Taraquly atyndaǵy qazaq halyq aspaptary orkestriniń kórkemdik jetekshisi ári bas dırıjeri Rahat Madreev jáne «Qurmet» ordeniniń ıegeri, Dáýletkereı atyndaǵy qazaq halyq aspaptary orkestriniń kórkemdik jetekshisi ári bas dırıjeri Erkin Nurymbetov bar qazylar alqasy jasady.
Baıqaý qorytyndysynda aqtaýlyq Álibek Muratov bas júldege ıe bolyp, ozyq shyqty. Al I oryn Soltústik Qazaqstan oblysynan kelgen Qaıyrly Ǵafýrovqa, II oryn – oraldyq Ashat Hasanovqa, III oryn shymkenttik Erlan Dáýrenbekov pen almatylyq Aıdos Meńdalıevke buıyrdy.
Qazbek QUTTYMURATULY,
«Egemen Qazaqstan»
Oral
