Ulttyq bank tóraǵasy Danııar Aqyshev 2017 jyly ishki baǵalarǵa teńge devalvasııasynyń aýysý áseri aıaqtalyp qalǵanyn aıtty. Qazirgi tańda azyq-túlik taýarlary men halyqqa aqyly qyzmetter usyný sektorynda ósimniń birqalypty qarqyny baıqalady. Ulttyq bank jyl qorytyndysy boıynsha ınflıasııa maqsatty dáliz ishinde 6-dan 8% deńgeıinde qalady dep boljaýda. Ulttyq bank 2018 jylǵa asa tómengi mánde ınflıasııa boıynsha 5-ten 7%-ǵa deıin maqsatty baǵdar bekitken. 2020 jylǵa qaraı Ulttyq bank ınflıasııanyń 4%-dyq deńgeıge deıin báseńdeýin kútedi. Qazirgi tańda qabyldanyp jatqan barlyq sharalar atalǵan maqsattarǵa qol jetkizýge baǵyttalǵan.
Energetıka mınıstri Qanat Bozymbaev munaı ónimderiniń ishki naryǵy úshin 111,1 mln tonna munaı óńdelgenin, bul ótken jyldyń osy kezeńimen salystyrǵanda 3,6%-ǵa joǵary ekenin málimdedi. Avtobenzın óndirisi 2 mln 270 myń tonnany qurady, bul da 2016 jyldyń sáıkes kezeńindegi kórsetkishten joǵary. AI-92 markaly benzınniń ortasha baǵasy qańtar aıynda lıtrine 135 teńge turdy, qyrkúıekte baǵa orta eseppen 150 teńgege deıin ósti, ósim 11%-dy qurady. AI-92 benzıni boıynsha ımport úlesi shilde-tamyz aılarynda 15%-dan qyrkúıekte 30%-ǵa deıin ulǵaıdy. Bul munaı óńdeý zaýyttarynda jańǵyrtý jumystarynyń aıaqtalýyna oraı jóndeý jumystaryn júrgizýge baılanysty boldy.
Sáıkesinshe, osyǵan oraı ishki naryqqa jetkizýdiń azaıýy men ımportqa shyǵarýdyń artýy baıqalady, bul baǵanyń ósýine yqpal etti.
Energetıka mınıstrligi naryqtaǵy baǵa jaǵdaıyn muqııat qadaǵalap otyr, máselen, birneshe janar-jaǵarmaı stansııalaryna qatysty ákimshilik is qozǵaldy. Sonymen qatar aǵymdaǵy jaǵdaıdy retke keltirý boıynsha qadamdar jasalyp jatyr.
Shymkent MО́Z-de qazan aıynda óńdeý jospary 110 myń tonnaǵa ulǵaıtyldy, bul ishki naryqty benzın jáne dızeldik otynmen qosymsha qamtamasyz etýge múmkindik beredi. Barlyq janar-jaǵarmaı stansııalarynyń jumysy esebinen, qarasha aıynda AI-92 benzıni boıynsha ımport úlesin 30%-ǵa, jáne jeltoqsanda 20%-ǵa deıin tómendetý kózdelip otyr, osylaısha qazirgi jaǵdaı turaqtandyrylady.
О́z kezeginde, aýyl sharýashylyǵy birinshi vıse-mınıstri Qaırat Aıtýǵanov ónimdik turaqtandyrý qorlarynyń jumysy ótken jylmen salystyrǵanda barynsha júıeli bolǵanyn ári bul áleýmettik mańyzdy taýarlar baǵasynyń ósimin shekteıtinin aıtty.
11 shildede ótken QR Úkimeti otyrysy barysynda ákimdikterge turaqtandyrý qorlary úshin ónimder satyp alý tapsyrylǵan bolatyn. Qazirgi tańda ákimdikterge atalǵan jumysty jandandyryp, osy jyldyń 15 qarashasyna deıin aıaqtaý qajet.
Sondaı-aq, otyrys barysynda Atyraý oblysy ákiminiń orynbasary Álibek Naýtıev, Soltústik Qazaqstan oblysynyń ákimi Qumar Aqsaqalov, Pavlodar oblysynyń ákimi Bolat Baqaýov, Ońtústik Qazaqstan oblysy ákiminiń orynbasary Tólegen Sársembaev jáne Astana ákimi Áset Isekeshev sóz sóıledi.
Baqytjan Saǵyntaev barlyq salalyq memlekettik jáne jergilikti atqarýshy organdarǵa taýarlar men qyzmetterge, ásirese áleýmettik mańyzdy azyq-túlik taýarlaryna baǵa ósimi máselesin erekshe baqylaýda ustaýdy tapsyrdy.
