Kantrı mýzykasynyń konsertine jınalǵan halyqqa Mandalaı-Beı qonaqúıiniń 32-qabatynan qala tóńireginiń turǵyny, 64 jastaǵy Stıven Paddok avtomatty vıntovkamen oq atyp, 59 adamdy jer jastandyryp, 527 adamdy jaralady. Bul qantógis AQSh-taǵy eń qanquıly qylmys dep tirkeldi.
Kóńil kóterip, án-mýzyka tyńdaımyz dep jınalǵan beıbit halyq qandy oıranǵa tap boldy. Eger basqa bir elde osyndaı qantógis bolsa turmysta muqtajdyq kórip, ashynǵan adamnyń qylyǵy shyǵar dep boljar edik. Biraq álemdegi eń baı eldiń esi durys, zeınetaqy alatyn adamyn muqtajdyqtan, ómirden túńilip, osyndaı qylmysqa bardy dep aıta almaısyń.
Búginge deıin belgili bolǵan jaǵdaıǵa qaraǵanda, Stıven Paddok býhgalter bolyp qyzmet istegen adam kórinedi. Sheshesimen ekeýiniń jalǵa berip, aqsha tabatyn páterleri de bolǵan. Odan basqa Paddoktyń jeńil motorly ushaqty qoldanýǵa lısenzııasy bar ekeni jáne ushatyn eki apparaty barlyǵy da anyqtalǵan. Ázirge polısııa ákesiniń qaýipti qylmysker bolyp, 1969 jyly izdeýde bolǵany týraly derek taýyp, Paddoktyń qylyǵy osy ispen baılanysty emes pe eken degen suraqty ózderine qoıyp otyr. Bul kúmándi kúdik, óıtkeni ákesiniń kegin 40 jyldan keıin zeınetke shyqqan soń esi durys adam qaıtaramyn dep oılamaıtyn shyǵar...
Qonaqúıdiń ózi qonǵan nómirine Paddoktyń 23 avtomatty vıntovkany qalaı alyp kirgeni de jurttyń bárin tańǵaldyrýda. Osynsha qarýdy engizgenine qaraǵanda, qanisher halyqty qyrýǵa ábden daıyndalǵan sııaqty. Keıbir kýágerlerdiń aıtýynsha, ol vıntovkanyń 30-40 magazınin bosatyp, 1 myńǵa jýyq oq atqan. Esteri shyǵyp, qaıda qasharlaryn bilmeı uılyqqan 20 myń kórermendi aıamaı qyrǵan.
Qalanyń barlyq polısııasy qanisherdi quryqtaýǵa tartylyp, osy jerdegi kazınonyń janynan jedel shtab qurylǵan. Áýejaıdyń jumysyna deıin ýaqytsha tejelip, ushýlar toqtatylǵan... Barlyq 1,5 mıllıondyq qala boıynsha tótenshe jaǵdaı jarııalanǵan. Qonaqúıdiń janyna dabylymen bezildetip, polısııa mashınalary kelgende Paddok olarǵa da oq jaýdyrǵan. Qonaqúı nómiriniń esigin buzyp kirgen polısııa qyzmetkerleri qanisherdiń ózin-ózi atyp óltirgenin kórgen.
Qanisherdiń turatyn úıin tekserý barysynda 20-ǵa jýyq atatyn qarýlar, birneshe myń patron jáne jarylǵysh zattar tabylǵan. Paddok áskerge de barmaǵan adam eken, qarý-jaraq jınaýmen de buryn aınalysyp kórmegenin jaqyndary men kórshileri aıtyp bergen.
Typ-tynysh, beıbit kásiptiń ıesi osyndaı qanqumarlyqqa qalaı barǵandyǵynyń jumbaǵyn ázirge eshkim taba almaı, dúdámal bolyp otyr. Biraq úıinen bir elektrondy qurylǵylar tabylǵan, onyń syry áli ashylǵan joq.
Barlyq jamandyqty, qantógisti moınyna alǵysy kelip turatyn «Islam memleketiniń» (Qazaqstanda tyıym salynǵan) jıhadshylar toby bul teraktynyń jaýapkershiligin moınyna alǵanymen, oǵan sený qıyn. FIB (FBR) Paddoktyń eshqandaı halyqaralyq terrorıstik uıymdarmen baılanysy anyqtalǵan joq, dep málimdedi.
Al Stıven Paddok aqyl-esi durys emes adam sekildi degen boljamǵa súıenýshiler kóp. Ázirge osy boljam basym bolyp tur. Árıne bári de anyqtalyp, qylmyskerdiń osynsha adamdy qyrýyna ne sebep bolǵany ashylar. Biraq qyrshynynan qıylǵan qanshama jastyń ómirin qalpyna keltire almaısyń.
Qazaq mundaı jamandyqty «Mal qulaǵy sańyraý» dep aýyzǵa almaıtyn. Biraq qazir eshkimnen eshteńeni jasyrýǵa bolmaıdy, tek saqtyq sharalary tereńdetilip, qarý-jaraq ustaıtyndardy shekteý ǵana adamdarymyzdyń tynysh ómirin saqtaýǵa múmkindik beretinin eshqashan esten shyǵarmaǵanymyz abzal.
Jaqsybaı SAMRAT,
«Egemen Qazaqstan»
