Ishi keń, terezelerinen jaryq tógilgen ǵımaratta qarııalar úshin barlyq jaǵdaı jasalǵan. Demalatyn jumsaq jıhazdar, teledıdar, shahmat, doıby oınaıtyn, gazet-jýrnaldar oqıtyn ústelder qoıylǵan. Qabyrǵalaryna úsh bıdiń sýreti, ardagerler uıymynyń jumysynan fotosýretter ilingen. Bir jaq shetinde aýdandyq ardagerler keńesi tóraǵasynyń bólmesi de bar.
Saltanatty sharada aýdan ákimi Bıboz Shaıahmetov sóılep: «Bul jer – aǵalarymyzdyń ózara aralasyp otyrýyna qolaıly orta. Buǵan deıin de ardagerler bólmesin aýdandyq meshitte ashqanbyz. Aldaǵy ýaqytta osy ardagerler úıinde bas qosqan jıyndaryńyz elimizdiń bolashaǵyna, jas urpaqtyń tárbıesine úlken septigin tıgizedi degen senimdemin», dep jumysyna sáttilik tiledi.
Aýdandyq ardagerler keńesiniń tóraǵasy Orynǵalı Qumarǵalıev: «Mundaı keń ardagerler úıi oblysymyzda birinshi ret bizdiń aýdanda ashylyp otyr», dep jınalǵandarǵa aq tilegin arnady. Aýdan basshysy bastaǵan ardagerler ǵımarat aldyna jas taldar otyrǵyzdy. Qatysýshylar ardagerlerdiń EKSPO-2017 halyqaralyq mamandandyrylǵan kórmesin aralaǵany túsirilgen beınebaıandy tamashalady.
Qanat ǴUMAROV
Atyraý oblysy,
Qurmanǵazy aýdany
