Komıtettiń kóshpeli otyrysyn ashqan D.Nazarbaeva Elbasy elimizdiń qorǵanys qabilettiligi men áskerı qaýipsizdigin qamtamasyz etýge, áskerlerdiń daıyndyq deńgeıin arttyrýǵa, áskerı tehnıkanyń jańǵyrtylýyna erekshe nazar aýdaratynyn atap ótti.
Jıynda elimizdiń Áskerı-Teńiz kúshteriniń qolbasshysy Jandarbek Januzaqov, UQK Tóraǵasynyń orynbasary-Shekara qyzmetiniń dırektory Darhan Dilmanov, «Aqtaý halyqaralyq teńiz saýda porty» Ulttyq kompanııasy» AQ prezıdenti A.Túrikpenbaev sóz sóıledi.
О́z kezeginde D.Nazarbaeva Batys aımaqtyń qaýipsizdigin qamtamasyz etýdiń strategııalyq mańyzyn atap ótti. Senator elimizdiń shekara qyzmeti men áýe qorǵanysyn nyǵaıtýdyń úsh jyldyq baǵdarlamasyn ázirleý qajettigin eske saldy.
D.Nazarbaevanyń pikirinshe, brakonerlikpen kúres, otandyq keme jasaý, áskerı qyzmetkerlerdi turǵyn úımen qamtamasyz etý, shekara qyzmetine áskerı bólimshe ornalasqan jerlerden jer telimderin berý máseleleri tezirek sheshýdi talap etedi. Sondaı-aq Halyqaralyq qatynastar, qorǵanys jáne qaýipsizdik komıtetiniń tóraǵasy D.Nazarbaeva Aýyl sharýashylyǵy mınıstrligi basshylyǵynyń qatysýymen Senatta dóńgelek ústel ótkizýdi tapsyrdy.
Aqtaýda bolǵan kezinde senatorlar áskerı-teńiz bazasynda, teńiz jaıaý áskeri brıgadasynda, áýe qorǵanysy nysandarynda, Aqtaý halyqaralyq teńiz saýda porty men teńizdegi soltústik termınalda, Túrikmenstanmen shekaradaǵy tehnıkalyq baıqaý beketinde jáne «Quryq» portynda boldy. Depýtattarǵa Shekara qyzmetiniń jáne Áskerı-Teńiz kúshteriniń «Sarbaz», «Qaraǵandy», «Alataý», «Oral» kemeleri, sondaı-aq teńiz bóligindegi memlekettik shekarany qorǵaý jáne kúzetýde shekarashy bólimshelerimen ózara is-qımyl tártibi kórsetildi.
Senatorlar Aqtaýda «Daryn» beıimdeý mektebiniń jumysymen jáne materıaldyq-tehnıkalyq bazasymen de tanysty.
«Samuryq-Qazyna» qory iske asyrǵan «Meniń elim» baǵdarlamasy aıasynda Mańǵystaý oblysyndaǵy zaǵıp balalarǵa arnalǵan 4 beıimdeý mektebi arnaıy jabdyqtarmen jáne ádistemelik materıaldarmen qamtamasyz etildi. Aıta keteıik, aı sońyna deıin Aqtóbe, Atyraý, Batys Qazaqstan jáne Shyǵys Qazaqstan oblystaryndaǵy 25 mektepti tıisti quraldarmen jabdyqtaý josparlanyp otyr.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
