Men óz tarapymnan, ári el qaýipsizdigi jolynda júrgen áskerı azamat retinde basa aıtarym, bul bolashaqqa batyl qadam jasap, elimizdi tórtkúl dúnıege tanytyp kele jatqan Elbasynyń kezekti mańyzdy bastamalarynyń biri jáne der kezinde qozǵalǵan tilimizdiń bolashaǵy úshin jasalǵan ǵylymı mańyzdy qadam dep bilemin. Táýelsiz eldiń negizgi belgileriniń biri retinde jazýdyń mańyzy óte zor.
Qazirgi zaman – jazý zamany. Adam jazý arqyly bilim alady, jazý arqyly bir-birimen baılanys jasap, júrgen-turǵanyn, jasaǵan jumystaryn da jazyp otyrady, ıaǵnı hattama, túrli qatynas-is qaǵazdary, kompıýter, ınternet, agent arqyly habarlasýlar – bári de jazý arqyly júzege asady.
Jer betinde latyn álipbıi barlyq salada qoldanylatyny baıqalady. Barlyq dári-dármek ataýlary, matematıka, fızıka, hımııa formýlalary, kóptegen termınder, mamandyqtarǵa, onyń ishinde áskerı salaǵa qatysty ǵylymı ádebıetter – barlyǵy da latyn álipbıimen baılanysty ekenin baıqaýǵa bolady.
Latyn álipbıindegi brıtandyq aǵylshyndar óz tilderiniń Amerıka, Eýropa qurlyqtarynda ár jerde ártúrli aıtylyp ketpeýine, nemister men evreıler jer-jerden kelgen óz qandastarynyń tildi buzbaı durys meńgerýine, fransýzdar óz tiline aǵylshyn kirme sózderiniń kóp enip ketpeýine alańdaýshylyq bildirip, únemi nazarda ustap, tilin damytý sharalaryn júrgizip, tipti «til polısııasyn» da osy iske qosyp otyr. Sondyqtan biz de tilimizge burynǵydan da jaýapkershilikpen qaraýǵa tıispiz. Egemendiktiń arqasynda ǵasyrlarǵa júk bolar jumystar ár salada atqarylyp jatyr. Men ózim basqa salaǵa aýyspaı-aq, elimizdiń ishki tynyshtyǵyn qamtamasyz etýshi Ulttyq ulan – kúshtik qurylymy jaıly aıtar bolsam, osynaý jyldar ishinde ulandyqtar elimizdiń qorǵanysyn bekem qorǵar qurylymǵa aınaldy. Qazirgi tańda tehnıkalyq bazasy, kadrlyq sapasy TMD elderinde eń aldynǵy orynda. Munyń barlyǵy da Elbasy saıasatynyń arqasynda júzege asqan isterdiń bir parasy ǵana.
Al endi áskerimiz qazirgi tańda memlekettik tilde sóılep keledi. Bul qarqyn jyldan-jylǵa artyp otyr. Latyn álipbıine kóshsek, ol óz áskerimizdiń boıyndaǵy ulttyq rýhty janı túsetini sózsiz.
Qaırat AQTANOV,
Qazaqstan Respýblıkasy
Ulttyq ulany «Ońtústik» óńirlik qolbasshylyǵynyń qolbasshysy, general-maıor
Almaty
