Ortalyq kommýnıkasııalar qyzmetinde ótken baspasóz máslıhatynda MMA jáne karate boıynsha álem chempıony Aıdar Mahmetov aldaǵy álem chempıonaty Astanadaǵy eleýli jáne keń aýqymdy sporttyq is-sharaǵa aınalady, deıdi.
«Bul joly tolyq jańartylǵan quram óner kórsetedi. Búginde kásibı sharshy alańda óner kórsetetin jáne buǵan deıingi jarystardyń chempıondary men júldegerleri arasynda Sergeı Morozovty, Shavkat Rahmonovty, Dáýren Ermekovty, Goıtı Dazaevany, Rashıda Dagaevany erekshe atap ótýge bolady. Qazaqstannyń qazirgi quramasynda chempıon ataǵyn jeńip alýǵa 21 jastaǵy Sanjar Ádilovtiń (salmaq dárejesi 56,7 kıloǵa deıin), 27 jastaǵy Mádı Raıhannyń (93 kg), bar-joǵy 20 jastaǵy qos sportshy qyzymyzdyń Zarına Qadyrbaeva (52,2 kg) men Marııa Agapovanyń (61,2 kg) jaqsy múmkindigi bar», dep atap ótti A.Mahmetov.
MMA-dan Qazaqstan quramasynyń bas jattyqtyrýshy Aıbek Shoqpytov sportshylar daıyndyǵyna keńinen toqtaldy.
«Bizdiń oqý-jattyǵý jıynymyz Aqtóbe qalasynda ótti. Barlyq sportshylar jeńisten úmitti. Olar álemdik jarysqa tyńǵylyqty daıyndaldy. Sportshylarymyz Astanadaǵy álem chempıonatynda jaqsy nátıjege kórsetetinine senimdimin. Sonymen qatar týǵan jerimizde óner kórsetemiz. Bul bizge erekshe kúsh-jiger, qoldaý beredi jáne árbir sportshy úshin mańyzdy», dedi ol.
Bas bapkerdiń aıtýynsha, sportshy qyzdarymyz da aldaǵy chempıonatqa tyńǵylyqty daıyndalǵan. Olardyń názik jandylar arasynda MMA-dan álem chempıondary atanýǵa barlyq múmkindik bar.
Ulttyq quramanyń múshesi Erkinbek Injeldiń sózinshe, qarsylastar osal emes.
«Menińshe, Astanada elimizdiń namysyn qorǵap, jaqsy oıyn órnegin kórsetemiz. Oqý-jattyǵý jıynynda tynymsyz jáne tyńǵylyqty daıyndaldyq. Árıne, Reseıden basqa elderden keletin myqty sportshylar bar. Biraq jankúıerlerimizdiń qoldaýy arqasynda jeńisti qoldan jibermeımiz», degen oıyn bildirdi.
Bul chempıonatqa álem boıynsha aralas jekpe-jek jankúıerleriniń nazary túspek. Ony tikeleı efırden otandyq «QAZSPORT» telearnasy kórsetedi. Álemniń túkpir-túkpirindegi kórermender aqtyq syndardy telearnanyń saıtynan tamashalaı alady. Chempıonat týraly arnaıy sıýjet «Euronews» telearnasynda shyǵady. Bul óz kezeginde álemdegi áýesqoı MMA kópshilikke pash etýge jańa serpin bermek.
MMA boıynsha V álem chempıonatyn MMA, pankratıon jáne grepplıng ulttyq federasııasy Astana qalasy ákimdiginiń, Aqparat jáne kommýnıkasııa mınıstrliginiń, «Samuryq-Qazyna» AQ qoldaýymen uıymdastyryp otyr.
Chempıonat «Dáýlet» sporttyq kesheninde ótedi.
Raýan QAIDAR,
«Egemen Qazaqstan
