Onyń ósý joly alystaǵy aıadaı aýyldan bastaý alǵan. Shamasy keshegi dáýirdiń jetpisinshi jyldarynyń basy bolar, birde sonyń aldynda qurylýdan keıin etek-jeńi túzelip qalǵan «Balyqtykól» keńsharyndaǵy aǵaıyndarǵa sálem bere bardyq. Bul Qaraǵandy oblysynyń Nura aýdanyndaǵy qoı ósirýge baǵyttalǵan sharýashylyq bolatyn. Bas esepshi Jumtaı Qunanbaev aǵamyzdyń úıine esikten júzi jadyrap kirgen bir kisi «Qosqopadan kelip turǵan betim. Birazdan beri syrttaı baıqaýymsha bıyl oqýyn bitirip kelgen ondaǵy jas mehanık shıraq jigit sekildi. Bólimshedegi burynnan júrýinen turýy kóp mashına-traktorlardy jóndetip, qatarǵa qostyryp qoıǵyzypty. Munda jumysqa kiriskennen bastap mehanızatorlardyń jaıbasarlyǵy, saldyr-salaqtyǵy seıildi. Bilimi talabyna saı jaqsy maman bolyp ósetin azamat syńaıly tegi», dedi. Qaı basshy bilikti kadrdy qalamaıdy, sharýashylyq dırektory Qorabaı Dosjanovtyń aıtsa aıtqanyndaı, sol qýanyshy tegin bolmady.
Bul oqıǵa, bálkim, esten shyǵyp keter me edi, eger bes-alty jyl ótkende endi aınaladaǵy dúnıeden tysqary qalǵan aýyl Kókózektegi úlkender aýzynan Qorekeń aıtqan esim jadymyzda jańǵyrmaǵanda. «Trýdovık» keńsharynyń turǵylyqty jurt muń-muqtajyna qulyqsyzdaý, túsinýge kerenaý basshylary arasyndaǵy jalǵyz baýyrlastyń aýylǵa janashyrlyǵy súısintipti. Keleshegine úlken úmit artarlyq jas ol kezdegi úrdis boıynsha aldymen saıası jetekshi bolyp taǵaıyndalyp, beldi qyzmeti arqyly úı irgesine deıin egilgen egin azyn-aýlaq mal ustaýǵa kedergi keltirýin, sondaı-aq ózekter boıyndaǵy jaıylymdarǵa kartop otyrǵyzý sııaqty tyǵyryq qyspaǵyn toqtatqan eken.
Biraz ýaqyttan soń Nura aýdanynyń ákimi laýazymynda kópshilik kóńiline qonǵan jaǵymdy isteri qulaqqa shalyna bastaǵany bar. Sóıtip eńbegi erte tanytyp, erte órletken azamattyń talapty basshy retinde de, halqy arqa tutqan azamaty retinde de kemeldenýi aýmaly-tókpeli, aıqaı-shýly, tartysty ýaqytqa kez kelgen. Jurttyń júıkesi juqaryp, quldyraý kúızeltken, tabys kózi joq, amalsyzdan qoldaǵy malyn satyp údere kóshken toqsanynshy jyldardyń eń bir kúrdeli shaǵynda aýyr júkti arqalaý ońaı bolmady. Degenmen «Namys – er qaıraǵy» deıtin sóz shyndyǵyn Elbasy senimin, el úmitin aqtaý úshin aıanbaı qyzmet etýde qaırat, qaısarlyq pen tabandylyq tanytty.
Aýdandy damytýǵa qosqan úlesi úlken. Eń aldymen, irgeli sharýashylyqtardyń joǵary jaqtyń nusqaýlaryna qaramastan usaq, jeke-jeke qojalyqtarǵa bólinip ydyraýdan saqtalýy osy kúnde óz jemisin berip otyr. Dıqan qaýymynyń uıymdasqan túrde eńbek etýiniń arqasynda «Qaınar, «Shahter», «Prjeval» JShS-ler baıyrǵy qalypta 30 myń gektardan astam alqaptan jylyna mıllıondaǵan put altyn dándi qambaǵa quıýda.
Jalpy alǵanda jekeshelendirý boıynsha keńsharlar taratylyp, árkimniń paı úlesterin alyp, óziniń qalaǵan sharýasymen shuǵyldaný erkine eshqandaı qysym jasalǵan joq. Biraq báriniń birde isiniń ońǵarylyp ketýine múmkindik azdyǵy, kedergi kóptigi, árqaısysynyń ári salǵanda 100 nemese 200 gektardan artyq jerge egin egýge ál-shamasy jetpeýi ólkeniń negizgi salasy astyq óndirisiniń jergilikti ekonomıkadaǵy úles salmaǵan tómendetpeý, jyl saıynǵy 300 myń gektarǵa deıin dán sebý kólemin kemitpeý úshin iri sharýashylyqtar shańyraǵyn shaıqaltpaý sharalary belgilendi.
– О́z aldyna bólek egin egýge umtylýshylar bastapqyda az bolmady. Al jumystyń bar júgi moıyndaryna túskende birazy tez aınyp qaldy. Tehnıkanyń jaramsyzdyǵy, tuqymnyń tapshylyǵy, qarjynyń jetimsizdigi tosqaýyl bola berdi. Mundaı kúıde astyqty mandytyp óndirý múmkin emestigi túsinikti edi. Osyǵan baılanysty biregeı qadamǵa bastap, tirek, qorǵan bola bilgen Daýylbaı Meıramulynyń uıymdastyrýshylyq, iskerlik, baıypty sheshimderi bárimizge zor kúsh berdi, ilgeri umtyldyrdy. Onyń sondaı syn kezeńge sáıkes qyrynan tanylýy aýdan baǵy boldy desem, artyq aıtqandyǵym emes, – deıdi «Shahter» JShS jetekshisi Georgıı Prokop.
Ár nárseniń baǵasy ýaqyt óte kele bilinedi emes pe. Sol ýaqytta ózimizdegige tosyrqaı qarap, elenbegen bul sharaǵa endi ǵana óris ashylyp, irilendirilgen sharýashylyqtar qataryn ulǵaıtý, aýyl-selo kooperasııasyn damytý qolǵa alynyp jatsa, nuralyqtardyń sonyń úlgisin jıyrma jyl buryn kórsetýi aýdandy elimizdegi eń iri astyqty aımaqtyń birine aınaldyrdy. Sonymen qatar basqa salalardyń qosa jetildirilýi tabysy kóldeı, talaby taýdaı agroónerkásiptik keshender qalyptastyrdy. Máselen, «Qaınar» eginmen birge asyl tuqymdy mal ósirý tizginin teń ustasa, «Shahter» bıdaıdyń baǵaly tuqymdarynyń jylyna 10 myń tonnasyn óndirýge qol jetkizdi. Al «Otqanjar» joǵala jazdaǵan quıryqty bııazy júndi « Qarǵaly» qoıyn óriske toltyrýda. Igiligin eńbekkerleri kórip keledi. Záýlim mektep, mádenıet úıi, sándi balalar baqshasy, toıhana, kelisti sport kesheni, syńǵyrlaǵan turǵyn úıler el ıgiligi úshin qyzmet isteýde.
Budan soń Parlament Májilisiniń depýtaty bolyp saılanýy ómirindegi úlken beles boldy. Al elý jyl elge adal qyzmeti keýdesinde «Parasat», «Qurmet» ordenderi men medaldar bolyp jarqyrady.
Aıqyn NESIPBAI
Qaraǵandy oblysy,
Nura aýdany
