Bir jaǵynan «Qazaq-Oner» ortalyǵy – úırenýshilerdi qol ónerine baýlyp qoımaı, kásipkerlik, saýda-sattyq pen mádenı sharalardy qosa atqaratyn oryn bolady.
Kólemi 800 sharshy metrdi alyp jatqan nysan Ýnıversıadany atqaryp salǵan Atletıkalyq aýyldaǵy Pıramıda zalyna, dástúrli mýzykanyń mýltımedııalyq ortalyǵy men ulttyq meıramhanaǵa jaqyn ornalasqan.
«Qazir ortalyqta 20 qolóner sheberiniń jumystary qoıyldy. Olardyń kóbi EKSPO kórmesinen keldi. Jańa buıymdar jasap úlgermedi. Biraq aldaǵy ýaqytta buıymdar qatary kóp bolary anyq. Buryn qolónershilerge BUU, IýSAID, IýNESKO sekildi halyqaralyq qoǵamdyq qorlar qoldaý kórsetetin. Bıyl alǵash ret Almaty ákimdigi qoldaý kórsetip, jańa jylǵa deıingi jaldaý qarjysyn kóterdi. Biz aıaǵymyzdan nyq turyp ketkenge deıin, árıne. Bul da isimiz alǵa basqansha aıtarlyqtaı kómek. Jáne ortalyqtyń barlyq jabdyǵy – jıhaz, sóre, oryndyqtar qala ákimdiginiń qarajatyna satyp alyndy. Buryn qolónershiler demeýshilerge arqa súıep, qorlardan kómek surap júretin. Qandaı da bir sheberlik synyptarynyń resmı jumys istegeni sırek edi. «Jalǵyzdyń úni shyqpas» degen. Sondyqtan ortalyqtyń maqsaty – birge jumys isteý. Bizde kassalyq qana emes, tólem kartasyn qabyldaıtyn apparat ta bolady. Bul arqyly qolónerdi shaǵyn bıznes deńgeıine deıin kóterip, bıýdjet túsimin arttyrýdy ǵana emes, klıentke zamanaýı qyzmet kórsetýdi kózdeımiz. Korporatıvtik klıentter habarlasady, olarmen qujat júzinde jumys isteý kerek. Seriktester qatarynda kóptegen týrıstik kompanııalar bar. Olar óz týrısterin tartady. Qazirge Shvesııadan kelgen týrısterdi qarsy aldyq. Olar óz qoldarymen kıiz basyp kórdi», – deıdi Almaty qalasy Isker áıelder keńesiniń múshesi, joba avtory, kásipker Aıgúl Janserikova.
«Qazaq-Oner» ortalyǵy Almatyǵa týrısterdi tartýǵa áleýeti bar nysan bolady dep kútilýde. Oǵan qosa jergilikti óndiristi jolǵa qoıyp, jańa ismerlerdiń qataryn kóbeıtetin meken bolmaq.
«Joba Almaty kásipkerler palatasy daıyndaǵan Týrızmniń jol kartasyna engizilgen. Biz bul jobalardy súıemeldep, qarjylaı emes qoldaý kórsetemiz. Sondyqtan osyndaı ortalyqtardyń qatary kóbeıgeni jaqsy», dedi Almaty qalasy kásipkerler palatasynyń dırektory Iýrıı Tileýmuratov.
Bir jaqsysy, bul jerde yqylas tanytqandar jańa qolóner túrine mashyqtanyp, otbasylyq demalys uıymdastyra alady. Munda kıiz basý, qysh quıý, zergerlik óner, quraq quraý, keste tigý, toqyma syndy ónerdiń talaı túri tabylady.
Aınash ESALI,
«Egemen Qazaqstan»
ALMATY
