Saıyn kóshesi men Raıymbek batyr kóshesiniń qıylysynda ornalasqan akter turǵan úıge Astana jáne Almaty qalalarynyń zııaly qaýym ókilderi, áriptesteri men týǵan-týystary jınaldy.
Teatr óneriniń maıtalmany sahnada júrip 300-den asa róldi somdaǵan. Alǵash ataqty Natalıa Sas qolynan jetektep teatrǵa ákelgende, bar bolǵany 19 jastaǵy jigit «Altyn kilt» ertegisindegi Bazılıo mysyqtyń rólimen-aq bolashaǵynyń zor ekenin baıqatyp úlgeredi. Osy ýaqyt aralyǵynda sahna óneri úshin týǵan saıypqyran balalarǵa arnalǵan qoıylymnan bastap eresek kórermenge arnalǵan salmaqty spektaklderge deıingi ár túrli obrazdy ózine ǵana tán sheberligimen shıratty. Q.Jákibaev kıno salasyna da eleýli úles qosqan tanymal akter. «Dersý Ýzala», «Jansebil», «Qan men ter», «Úsheý», «Dáneker», «Otyrar», «Mahabbat beketi», «Toǵysqan taǵdyrlar» fılmindegi rólderi kıno óneri tarıhynda qaldy.
Almaty qalasy ákimi qabyldaǵan qaýlyǵa sáıkes, Ǵ.Músirepov atyndaǵy Qazaq memlekettik akademııalyq balalar men jasóspirimder teatrynyń uıymdastyrýymen, Qazaqstannyń halyq ártisi, Qazaqstannyń eńbek sińirgen qaıratkeri, Táýelsiz «Platınaly Tarlan» syılyǵynyń ıegeri Qasym Ábekuly Jákibaevtyń qurmetine ornatylǵan taqtanyń aq shymyldyǵy túrilgen soń saltanatty rásimde sóz alǵan Satybaldy Narymbetov, Nurjuman Yqtymbaev, Roza Áshirbekova syndy ónerdegi áriptesteri talanttyń san qıly taǵdyry týraly jan tebirentetin estelikterimen bólisti.
Aıgúl AHANBAIQYZY,
«Egemen Qazaqstan»
ALMATY
