Tarqata aıtar bolsaq, taıaýda ÚEU-nyń qyzmeti týraly aqparattyń qoljetimdiligin qamtamasyz etý maqsatynda úkimettik emes uıymdardyń derekter bazasy qurylǵan-dy. Azamattar ÚEU derekqory arqyly osy uıymdardyń qyzmetine qatysty qajetti aqparatty ala alady. Sonymen qatar bul derekqordyń kómegimen ÚEU-lar bir-birimen aqparat almasyp, ózara baılanys ornatatyn bolady. ÚEU derekqory úkimettik emes uıymdardyń qyzmetiniń ashyqtyǵyn qamtamasyz etý jáne olardyń jumysymen halyqty aqparattandyrý maqsatynda, sondaı-aq memlekettik áleýmettik kelisimsharttardy ornalastyrý, granttar berý jáne júldelerdi taǵaıyndaý sheńberinde qoldaný úshin qurylǵan aqparattyq alań bolyp tabylady.
Qazirgi tańda ÚEU derekqorynda qazaqstandyq jáne sheteldik 3 myńdaı uıymnyń tájirıbeleri týraly aqparat kórsetilgen. ÚEU derekter bazasyndaǵy aqparattar Din isteri jáne azamattyq qoǵam mınıstrliginiń Azamattyq qoǵam isteri komıtetine jyl saıyn 31 naýryzǵa deıin usynylýy tıis.
Aqparattar ÚEU derekqorynyń ınternet-portaly arqyly (infonpo.kz) poshta arqyly nemese qaǵaz jáne elektrondy BAQ arqyly usynylady.
Negizinde, aqparatty ınternet-portal arqyly berý jumys prosesin jeńildetedi, esepti toltyrýdyń durystyǵyna yqpal etedi Aıta ketý kerek, ınternet-portalǵa uıymnyń HQO-dan (halyqqa qyzmet kórsetý ortalyqtary) alynǵan ESQ (elektrondy sıfrly qoltańba) kilti arqyly tirkelýge bolady.
Derekqorǵa aqparatty usynbaý, ýaqytynda bermeý, sondaı-aq jalǵan nemese burys aqparat bergen jaǵdaıda ákimshilik jaýapkershilikke tartý qarastyrylǵan. Ákimshilik quqyq buzýshylyq týraly Kodekstiń 489-1-babyna sáıkes, quqyq buzýshylyq oryn alǵan jaǵdaıda eskertý jasalady, al qaıtalanatyn bolsa, 25 AEK mólsherinde aıyppul salynady nemese zań buzýshylyq jasaǵan uıymnyń qyzmeti úsh aı merzimge toqtatylady.
Esterińizge sala keteıik, Qazaqstanda búginde 19 680 úkimettik emes uıym tirkelgen, onyń 13 879-y óz qyzmetin belsendi júrgizýde.
Joldybaı BAZAR,
«Egemen Qazaqstan»
