Medısına shekara tańdamaıtynyn aıtqan aımaq basshysy sheteldiń bilikti ortoped, travmatolog mamandary qatysyp otyrǵan búgingi halyqaralyq ǵylymı-praktıkalyq konferensııanyń mańyzy zor ekenin atap ótti.
«Búgingi konferensııadaǵy kóterilip otyrǵan taqyryptyń qoǵam úshin óte mańyzdy ekendigin basa aıtqym keledi. Sońǵy jyldary otandyq medısına salasynda dárigerlerimiz eleýli jetistikterge jetip, halyqtyń densaýlyǵyn qorǵaýda tyń tehnologııalardy qoldanysqa engizýde. Memleket basshysynyń 2015-2019 jyldarǵa arnalǵan «Densaýlyq» memlekettik baǵdarlamasynyń nátıjesinde medısına salasyn qarjylandyrý jyldan jylǵa ulǵaıyp, aýrýhanalar men emhanalardyń materıaldyq-tehnıkalyq jaǵdaıy jaqsarýda. Dárigerler medısınasy ozyq elderdiń klınıkalarynda tájirıbe jınaqtap, kásibı sheberlikterin shyńdaýda. Ult densaýlyǵyn saqtaýda aýrýdyń aldyn alýǵa basa mán berilip, salamatty ómir saltyn ustanýda», - dedi ákim.
Konferensııa barysynda Qazaqstan jáne onyń halqy az qonystanǵan eldi mekenderge jáne mamandandyrylǵan kómek kórsetý ortalyqtarynyń arasyndaǵy úlken ara qashyqtyq úshin óte ózekti bolyp keletin travmatologııa jáne ortopedııada ınnovasııalyq tehnologııalardy engizý jáne qoldaný, ortopedııalyq - travmatologııalyq kómek uıymdastyrý, jaraqattanýshylyqty aldyn alý máseleleri boıynsha plenarlyq jáne seksııalyq otyrystar ótkizildi. Sondaı - aq, balalar ortopedııasy men travmatologııasy, ortopedııalyq - travmatologııalyq praktıkadaǵy qatelikteri jáne asqynýlardyń ózekti máseleleri de osy basqosýda talqylandy.
Halyqaralyq dárigerler jıynynda farmasevtıkalyq kompanııalar qazirgi zamanǵy medısınalyq jabdyqtar men medısınalyq maqsattaǵy buıymdardy sondaı - aq, jetekshi medısınalyq óndirýshi fırmalar dárilik preparattaryn usyndy.
Konferensııa qatysýshylary búgingi basqosý halyqaralyq tájirıbeni úırený, bilimdermen almasý, odan ári konstrýktıvti jáne ózara tıimdi yntymaqtastyqty arttyrý úshin jáne ǵylymı, iskerlik baılanystardy qurý alańy bolyp qyzmet etetine senim bildirip, tarqasty.
Úsh mıllıonǵa jýyq halyq bar Ońtústik Qazaqstanda bıyl oblystyń densaýlyq saqtaý salasyna bólingen qarjy 125 mıllıard teńgeni quraǵan. Sonyń nátıjesinde óńirdiń shalǵaı aýyldarynda da medısınalyq qyzmettiń sapasy jaqsarǵan. Memleket tarapynan jasalyp jatqan osyndaı qamqorlyqtyń nátıjesinde búginde buryn sońdy bolmaǵan kúrdeli otalardy Astana, Almaty qalalarynda ǵana emes, Shymkentte de jasaý múmkin bolyp otyr. Sońǵy jeti jylda oblys halqynyń ómir súrý uzaqtyǵy 69-dan 72-ge deıin joǵarylasa, ana men bala ólim-jitimi sońǵy bes jyl ishinde edáýir tómendegen.
