Qazaqtyń balýany, ánshi-kompozıtor, seri, halyq arasynda Balýan Sholaq atanǵan Nurmaǵanbet Baımyrzaulynyń ómirinen syr shertetin qoıylymdy teatr ujymy 1 qazan kúni Stokýell teatrynyń (Stockwell Playhouse) sahnasynda jınalǵan kórermenge usyndy. Kúresker tulǵa Balýan Sholaqtyń sahnalyq beınesin teatrymyzdyń talantty akteri, sahna sheberi Erlan Bilál somdady.
Londondaǵy bul festıval belgili qazaq jazýshysy, dramatýrg Dýlat Isabekovtiń 75 jyldyǵyna oraı uıymdastyrylyp otyr. Bıyl úshinshi márte ótkizilip otyrǵan festıvaldiń uıymdastyrýshysy – Londondaǵy Aıtmatov akademııasy. 2011 jyly London qalasynda professor, fılosofııa ǵylymdarynyń doktory Rahıma Abdývalıeva negizin qalaǵan Aıtmatov akademııasy – áıgili jazýshynyń shyǵarmalaryn álem tilderine aýdarýmen jáne uly jazýshy qaldyrǵan mol murany dáripteýmen aınalysady.
Elimizde ótken aýqymdy, mańyzdy jobalardyń biri – Ekspo-2017 halyqaralyq mamandandyrylǵan kórmesiniń mádenı baǵdarlamasy aıasynda kóptegen is-sharalardyń atqarylǵandyǵy barshamyzǵa belgili. Ártúrli baǵytta ótken teatr jáne kıno festıvalderi, árqandaı konsertter men kórmeler qazaqstandyqtar men sheteldik qonaqtarǵa erekshe áser qaldyrsa, óz salasynyń mamandary úshin tájirıbe almasý mektebi boldy. Ekspo-2017 kórmesi negizinde ótken mádenı jáne sporttyq sharalardyń joǵary deńgeıde uıymdastyrylýy – Mádenıet jáne sport mınıstrliginiń qajyrly eńbeginiń jemisi. Halyqaralyq kórmeniń Ulybrıtanııa pavılonynda ótken aǵylshyn tilindegi shyǵarmalardyń tusaýkeserinde jazýshy-dramatýrg Dýlat Isabekovtiń shyǵarmalaryn alys-jaqyn shetelden kelgen meımandar joǵary baǵalaǵan bolatyn.
Anglııa parlamentiniń joǵarǵy Lordtar palatasyndaǵy Dýlat Isabekovpen kezdesý óte áserli boldy.
Mádenıet jáne sport mınıstrliginiń osy keleli is-sharany moınyna alyp, qazaq teatr óneriniń álem sahnasynda saltanat qurýyna atsalysýy – ult rýhanııatynyń álemdik keńistikte erkin kósilýine óz septigin tıgizdi.
Gúlzııa SÁDÝAQASOVA
