Munaı-gaz salasyndaǵy «Atqylama-2017» arnaıy taktıkalyq aýmaqtyq jattyǵýyna Atyraý, Mańǵystaý, Batys Qazaqstan, Qyzylorda, Aqtóbe oblystarynan kelgen qutqarýshylar qatysty. Mamandardyń túrli apattyq jaǵdaıdaǵy áreket etý sheberlikteri sarapqa salynǵan sharany Atyraý oblysynyń ákimi Nurlan Noǵaev ta arnaıy kelip kórdi. «Apattyq jaǵdaı munaı-gaz, hımııa ónerkásibi salalarynda da kezdesedi.
Sol apatty aýyzdyqtap, adamdardyń ómirlerin saqtaý, jaǵdaıdy qalpyna keltirý – qutqarýshylarǵa júkteletin úlken mindet. Shartty túrde oryndalatyn jattyǵýlar osymen shektelip, naqty ómirde apatty jaǵdaı bolmasyn», dedi aımaq basshysy.
Arnaıy qyzmet qurylymdary qandaı jaǵdaıda da atqylamalarǵa qarsy turýǵa daıyn. Bul rette «Kásibı áskerılendirilgen apattyq-qutqarý qyzmeti» mekemesiniń jumysyn aıryqsha ataýǵa bolady. Kásiporynnyń 13 bólimshesi Qazaqstannyń barlyq ónerkásiptik aımaqtarynda ornalasqan.
Mekemede 2800-den astam joǵary bilikti kásibı qutqarýshy, 600 birlik apattyq-qutqarý tehnıkasy, 6700 birlik arnaıy taǵaıyndalǵan jabdyq bar.
Qurylym basshysy general-maıor Dıhanbek Satylǵanov munaı-gaz salasyndaǵy qaraýsyz qalǵan nysandardaǵy apattardy joıýǵa da qatysatyndaryn aıtady.
Mysaly, Aqtóbe oblysy «Qaratóbe» ken ornyndaǵy, Atyraý oblysy «Kúmisbek» ken ornyndaǵy qaraýsyz qalǵan uńǵymalarda bolǵan apattardy joıý jumystaryn júrgizgen. «О́tken mamyr aıynda Atyraý oblysynyń jer qoınaýyn paıdalanýshylar erikti apattyq-qutqarý qyzmetiniń kúshteri men quraldarynyń qyzmet kórsetý nysany bolmaýynan apatqa ushyrady, oblystaǵy bólimsheniń kómegine júginip, bizdiń qutqarýshylarymyz qysqa merzimde apatty joıdy», deıdi D.Satylǵanov.
Mekemedegi oqý ortalyqtarynda jyl saıyn 1800-den astam adam oqıdy. Jyl basynan beri apattyq-qutqarý jumystaryn oryndaý kezinde 185 adam qutqarylyp, apatty joıý oryndarynda 319 adamǵa medısınalyq kómek kórsetilgen.
Bes oblystyń qutqarýshylary bas qosqan jattyǵý sharasynda apattan zardap shekken adamdy qutqarý, magıstraldy munaı qubyrynda bolǵan aqaýdy joıý, úıindi astynda qalyp qoıǵan adamdy alyp shyǵý, munaı quıylatyn ydysqa túsip ketken jumysshyny aman alyp qalý, munaı atqylaǵan uńǵymany aýyzdyqtaý sekildi jaýapty da qıyn tapsyrmalar oryndaldy. Qutqarýshylardyń bári de mamandyqtarynyń naǵyz maıtalmandary ekenderin kórsetti. Al oqý-jattyǵý sharasynyń ekinshi kúni kishi aıaq doptan ótken jaryspen jalǵasty.
Baqytgúl BABASh,
«Egemen Qazaqstan»
ATYRAÝ
