Kezdesýge Parlament Senatynyń tóraǵasy Q.Toqaev, Reseı Federasııasynyń Syrtqy ister mınıstri S.Lavrov, Máskeý memlekettik halyqaralyq qatynastar ınstıtýtynyń rektory A.Torkýnov, ERG kompanııasy dırektorlar keńesiniń múshesi P.Shodıev, Qazaqstannyń Syrtqy ister mınıstri Q.Ábdirahmanov qatysty.
Áńgime barysynda Nursultan Nazarbaev Máskeý memlekettik halyqaralyq qatynastar ınstıtýtynyń mártebesi erekshe ekenin aıtyp, onyń dıplomattar men syrtqy saıasat vedomstvolary qyzmetkerleriniń arasyndaǵy bedeli joǵary ekenin atap ótti.
– Máskeý memlekettik halyqaralyq qatynastar ınstıtýty únemi kópshilik bilim alýǵa umtylatyn aıryqsha oqý orny boldy. Jastarymyz qazir de sonda oqyǵandy qalaıdy. Biz Máskeý memlekettik halyqaralyq qatynastar ınstıtýtymen jáne Astanada fılıaly bar Máskeý memlekettik ýnıversıtetimen tıimdi baılanystar ornattyq, – dedi Memleket basshysy.
Qazaqstan Prezıdenti memleketaralyq dıalogty nyǵaıtý máselesine toqtalyp, dıplomatııalyq kadrlardy Eýrazııalyq ekonomıkalyq odaqtyń jumysyna tartý qajettigin aıtty.
Kezdesýge qatysýshylar Astanada ótip jatqan Máskeý memlekettik halyqaralyq qatynastar ınstıtýty túlekteriniń IV halyqaralyq forýmynyń aýqymdylyǵy men onyń elderimiz arasyndaǵy dıplomatııalyq baılanystardy kúsheıtýdegi rólin atap ótti.
