Forýmnyń ashylý saltanatynda Senat Tóraǵasy Qasym-Jomart Toqaev Prezıdent Nursultan Nazarbaevtyń sharaǵa qatysýshylarǵa arnaǵan qutyqtaýyn oqyp berdi. Memleket basshysynyń quttyqtaýynda MGIMO-ǵa óz eliniń ómirinde mańyzdy ról atqaratyn kórnekti saıası jáne qoǵamdyq qaıratkerler, dıplomattar, jýrnalıster, kásipkerlerdiń tutas bir shoǵyrynyń qarashańyraǵy retinde joǵary baǵa berildi. Qazaqstan Prezıdenti jer júzindegi saıasattyń, ekonomıkadaǵy jáne qoǵamdyq ómirindegi kúsheıe túsken dúrbeleńder aıasynda halyqaralyq sala mamandarynyń jaýapkershiligi men róli arta túskenin atap ótti.
Q.Toqaev óz sózinde Máskeý memlekettik halyqaralyq qatynastar ınstıtýty Forýmy jahandyq kún tártibindegi asa mańyzdy máseleler boıynsha pikir almasý múmkindigin beretinin atap ótti.
Senat Tóraǵasy Qazaqstan BUU Qaýipsizdik Keńesiniń turaqty emes múshesi bolardyń aldynda ıadrolyq qarýdy taratpaýǵa, terrorızmge qarsy kúreske, dinaralyq únqatysýdy qalyptastyrý máselelerin sheshýge meılinshe úles qosqanyn eske saldy. Astana EQYU, ShYU, TMD, EAEO, AО́SShK sammıtterin ótkizgen iri halyqaralyq ortalyq retinde qalyptasty.
Senat Tóraǵasy Qazaqstan Elordasynda Álemdik jáne dástúrli dinder lıderleriniń Sezi júıeli túrde ótip otyratynyna mańyz berip, oǵan rýhanı jáne saıası qaıratkerler, onyń ishinde BUU Bas hatshysy, Iordanııa Koroli, Fınlıandııa Prezıdenti jáne taǵy basqa da tulǵalar qatysqanyn aıtty. «Bizdiń maqsatymyz – saıası kóshbasshylar men dinı qaıratkerlerdiń bir ústel basyna jınalǵany, eń bastysy, olardyń birin-birin tyńdaǵany jáne estigeni», - dep atap ótti Senat Tóraǵasy.
Q.Toqaev 1994 jyly Prezıdent N.Nazarbaevtyń Máskeý memlekettik ýnıversıtetindegi áıgili leksııasynan bastaý alatyn Eýrazııa Ekonomıkalyq Odaq aıasyndaǵy ıntegrasııalyq úderister týraly óz oılarymen bólisti. «Geosaıası turǵydan qaraǵanda, bul odaq Qazaqstan múddelerine sózsiz sáıkes keledi, biz ony qoldap kelemiz», - dedi Parlament joǵarǵy Palatasynyń basshysy.
Qazaqstanda júrgizilip jatqan saıası, ekonomıkalyq jáne áleýmettik transformasııa úderisterine nazar aýdaryldy. Q.Toqaev forýmǵa qatysýshylarǵa Memleket basshysynyń bastamasymen júzege asqan konstıtýsııalyq reforma týraly, sondaı-aq «100 qadam» strategııasy men «Rýhanı jańǵyrý» baǵdarlamasy týraly aıtyp berdi.
«Nurly jol» baǵdarlamasy týraly aıta kelip, Tóraǵa onyń Qazaqstandaǵy kólik qatynasy jelisin, logıstıka jáne barlyq ınfraqurylymyn jańǵyrtýǵa baǵyttalǵanyn atap ótti.
Reseıdiń syrtqy ister mınıstri Sergeı Lavrov Prezıdent Vladımır Pýtınniń quttyqtaýyn oqydy. Reseı kóshbasshysy Astanany «kóptarapty dıplomatııanyń, halyqaralyq ekonomıkalyq yntymaqtastyqtyń, Eýrazııalyq ıntegrasııalyq úderister ortalyqtarynyń biri» dep atady.
«Qazaqstan Respýblıkasynyń Prezıdenti N.Á. Nazarbaevty, Qazaqstan Respýblıkasy Parlamenti Senatynyń Tóraǵasy, Máskeý memlekettik halyqaralyq qatynastar ınstıtýty túlegi Q.K. Toqaevty, sondaı-aq osy aýqymdy sharanyń ázirleýge qatysqan barlyq qazaqstandyq áriptesterdi shynaıy quttyqtaǵym keledi», - delingen Reseı Prezıdentiniń úndeýinde.
Sharaǵa qatysýshylarǵa Qazaqstan syrtqy ister mınıstri Qaırat Abdrahmanov jáne Máskeý memlekettik halyqaralyq qatynastar ınstıtýty rektory Anatolıı Torkýnov ta úndeý joldady.
Forým aıasynda álemdik saýdadaǵy qazirgi jaǵdaı, aımaqtyq yntymaqtastyqtyń keleshegi, onyń ishinde bilim berý jáne mádenıet salasy boıynsha sessııalar bolady. Sharaǵa TMD, Eýropa Odaǵy, Soltústik Amerıka, Taıaý Shyǵys, Azııa-Tynyq muhıty aımaǵy elderinen 400-den astam Máskeý memlekettik halyqaralyq qatynastar ınstıtýty túlekteri, sondaı-aq Qazaqstannyń memlekettik organdary, qoǵamdyq jáne iskerler qaýymdastyǵynyń ókilderi qatysýda.
