Oǵan respýblıkalyq bıýdjetten 5,9 mlrd teńge qarjy bólingen. Bıyl jyl sońyna deıin merdigerler 1 mlrd 802 mln teńgeni ıgerý kerek. Qazirgi tańda eski sý qoımanyń orny tazartylyp, elektr jelileri tartylyp, 12 shaqyrym jol tóseldi. Jóndeý jumystaryna 120 adam men 70-ten astam ártúrli tehnıka jumyldyrylǵan. Merdiger mekemeniń bas ınjeneri Rahym Razbaevtyń aıtýynsha, jańa bóget aldyńǵysynan álde qaıda berik jáne sapaly bolmaq. Tospanyń jalpy uzyndyǵy 310 metr, bıiktigi 55,5 metr. Al sý qoımaǵa 42,2 mln tekshe metr sý sııady.
Strategııalyq mańyzdy nysan qaıta iske qosylsa eldiń ál-aýqaty artady deıdi mamandar.
«Qant qyzylshasyn ósiretin alqaptar qalpyna keledi. Jańa jumys oryndary ashylyp, óńirdiń ekonomıkasyna qan júgiredi. Buǵan eń aldymen sharýalar qatty qýanyp otyr. Sebebi burynǵy sý qoıma tek 1 420 gektar alqapty sýarsa, jańa tospamen 6 700-7 000 gektar alqapty ıgerýge múmkindik bar», deıdi «Qazsýsharýashylyǵy» RMK Almaty oblystyq fılıalynyń dırektory Seıilhan Muhamadıev.
Kásiporyn basshysy jańa sý qoımada jumys isteıtin mamandardyń da jaǵdaıy qarastyrylǵanyn aıtyp otyr. Bógettiń basynda jáne tómengi jaǵyndaǵy sý taratý torabynda 4 páterli eki úı salynyp jatyr. Jalpy bógettiń qurylysyn 2018 jyldyń jeltoqsan aıynda aıaqtaý kózdelgen.
Esterińizge sala keteıik, 2010 jyly 12 naýryzda Qyzylaǵash sý qoımasynyń arnasy tolyp, bóget shydas bermeı búkil bir aýyldy qyzyl sý shaıyp ketken bolatyn.
