Eki qurama bir-birin ańdysyp jatpaı, birden shabýylǵa kóshti. Alǵashqy bolyp bizdiń Roman Murtazaev urymtal sátte baspen soqqy jasap úlgerdi. Artynsha bir kezderi «Aqtóbe» sapynda dop tepken Pızellı sol aıaqpen shirene teýip, Lorııany synap kórdi. Qaqpashymyz qınalsa da dopty judyryqpen qaıtara aldy. Artynsha qonaqtar sapynan Malakıan men Sımonıan bir-bir retten dopty qaqpamyzǵa baǵyttaǵanmen, bul jerde Lorııa óz ornynan tabyla bildi.
Birinshi taımnyń orta tusynan bastap qazaq jigitteri oıyndy óz qoldaryna qansha alǵysy kelgenimen, Mhıtarıan bastaǵan Armenııa quramasy ondaı múmkindik bermedi. Kerisinshe, qonaqtardyń keıbir oıynshylarynyń deńgeıi bizdiń fýtbolshylardan anaǵurlym joǵary ekeni baıqalyp turdy. Genrıh Mhıtarıannyń ózi nege turady?! Qorǵaýshylarymyzdy shyr kóbelek aınaldyryp júrgen «Manchester Iýnaıted» oıynshysy 26-mınýtta Lorııamen jekedara shyǵyp, dopty qaqpashymyzdyń ústinen asyra saldy. Esep – 1:0, armıandardyń paıdasynda.
Osy goldan keıin bizdiń jigitterdiń qarqyny báseńdegeni anyq baıqaldy. Esesine qonaqtar shabýyl ústine shabýyldy údete tústi.
Almas MANAP,
«Egemen Qazaqstan»
