Bul týraly Ortalyq kommýnıkasııalar qyzmetinde ótken baspasóz máslıhatynda Bilim jáne ǵylym mınıstrligi Kásiptik jáne tehnıkalyq bilim departamenti dırektorynyń orynbasary Ǵalııa Dáýletova málimdedi.
Spıkerdiń sózinshe «WorldSkills Kazakhstan» jobasy – jumysshy mamandyqtarynyń mártebesin arttyrý men dáripteýdi kózdeıdi.
«Jobanyń maman tapshylyǵyn azaıtyp, básekege qabiletti, ınnovasııalyq damý jolyndaǵy elimiz úshin asa qajetti kadr daıyndaýda qosatyn úlesi zor. Aǵymdaǵy jyldyń mamyr aıynda Astana qalasynda «Worldskills Kazakhstan» ulttyq chempıonaty ótkizildi. Atalǵan sharaǵa elimizdiń barlyq óńirinen 200-den astam stýdent jastar, jas mamandar qatysty», dedi Ǵalııa Dáýletova.
Sonymen qatar spıkerler eki jylda bir márte uıymdastyrylatyn «WorldSkills Competition» álem chempıonatyna bizdiń elimiz 2014 jyldan bastap qatysyp kele jatqanyn atap ótti.
«WorldSkills Competition» 44-álem chempıonaty qurylys, óndiris jáne mashına jasaý tehnologııalary, robotty tehnıka, kólik pen logıstıka sekildi baǵyttardy qamtıdy. Bul jarys jastardyń ózderiniń sheberligin, kásibı deńgeıin dáleldeýine kómektesedi. Sonymen qatar olarǵa biliktiligin, bilimin jetildirý úshin jáne bolashaqta qyzmet tańdaýda kásibı mamandardan aqyl-keńes alýǵa úlken múmkindik beriledi. Elimizdegi «WorldSkills» chempıonatyn «Kásipqor» holdıngi uıymdastyryp kele jatyr. Olar aımaqtyq, ulttyq deńgeıde ótýine óz úlesterin qosýda», dedi Ǵalııa Dáýletova.
Raýan QAIDAR,
«Egemen Qazaqstan»
