Ulttyq akademııalyq kitaphanada ótken komıssııa otyrysynda Memlekettik hatshy Prezıdent N.Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasynda bizge ashyqtyq pen úzdik jetistikterge beıimdilik qajettigin aıqyndap bergenin aıtty.
«Memleket tarapynan otandyq ǵylym men tehnıka salasynyń damýyna zor mán berilip kele jatqanyn ózderińiz bilesizder. Elbasy «Qazaqstannyń úshinshi jańǵyrýy: jahandyq básekege qabilettilik» atty bıylǵy Joldaýynda ekonomıkanyń tehnologııalyq turǵydan jańǵyrýyn jedeldetý úshin ǵylymdy tehnologııa men ınnovasııaǵa baǵyttaý qajettigin atap ótti. Zertteýshi ǵalymdar, óndiris jańashyldary, ǵylymı-tehnıkalyq zııaly qaýym ókilderi el ekonomıkasynyń damýyna, ulttyń zııatkerlik áleýetin nyǵaıtýǵa eleýli úles qosyp jatyr. Biz 2017 jylǵy Qazaqstan Respýblıkasynyń ál-Farabı atyndaǵy ǵylym men tehnıka salasyndaǵy Memlekettik syılyǵyn alý úshin usynylǵan, aldyn ala irikteýden ótken jumystardy tanystyrý men talqylaý nátıjelerin qarastyramyz jáne tizimin bekitip, qorytyndy sheshim qabyldap, Elbasyna ózimizdiń usynysymyzdy aıtýymyz qajet», dedi Memlekettik hatshy.
Osy oraıda G.Ábdiqalyqova ál-Farabı atyndaǵy ǵylym men tehnıka salasyndaǵy Memlekettik syılyq ǵylym ári tehnıka qaıratkerleri eńbegin qoǵam men memleket tarapynan joǵary baǵalaýdy bildiretinin atap ótti.
Aıta keteıik, eki jylda bir ret jeti syılyqqa deıin beriletin bul syılyqty Memleket basshysy Táýelsizdik kúni qarsańynda tapsyrady dep kútilýde. Bıylǵy jyly mundaı marapatty alý úshin barlyǵy 24 jumys túsip, aldyn ala irikteýden soń ekinshi kezeńge onyń 11-i ótken. Ál-Farabı atyndaǵy ǵylym men tehnıka salasyndaǵy 2017 jylǵy Memlekettik syılyqtyń aqshalaı kólemi 18,6 mln teńgeni quraıdy. Komıssııa otyrys qorytyndysy boıynsha syılyqty berý úshin Memleket basshysynyń qaraýyna usynylatyn jumystardyń tizimin aıqyndady.
Nurlybek DOSYBAI,
«Egemen Qazaqstan»
