Memlekettik qyzmetkerlerdiń zańsyz áreketterin jaýyr attyń jaýyrynan sıpaıtyndaı kúnder artta qalyp barady. Bul joly ekiniń biriniń tisi bata bermeıtin memlekettik kirister basqarmasynyń basshylary men jaýapty mamandaryna tabaǵa shyjǵyrylǵandaı kúı keshtirip, eń dókeıine qyzmetine tolyq saı emes degen sheshim shyǵaryldy.
Sóıtse, olar áleýmettik jáne zeınetkerlik tólemaqylar boıynsha qaryzǵa belsheden batqan kásiporyndy shaǵyn bıznes nysanyna jatqyzyp, 15 aılyq eseptik kórsetkish mólsherinde ǵana aıyppul salǵan. Jergilikti salyqty tolyqtyrýǵa kirisýdiń ornyna orta kásipkerlik sýbektisin 212 mıllıon teńge aıyppul tóleý múmkindiginen aıyrǵan. Kassany paıdalanýǵa shekteý qoıylǵanyna qaramastan, esep aıyrysý jalǵasyp, isti qaraý merzimi negizsiz shegerilgen. Osy ýaqyt aralyǵynda seriktestik shaǵyn bıznes uıymy retinde qaıta tirkelip, jaýapkershilikten jaltaryp ketken. Qadaǵalaýshy organnyń bul tirligi eshqandaı zań normalarymen syıyspaıtyny betterine basylyp, bul máselege aldaǵy ýaqytta taǵy da oralatyny atap kórsetildi.
Alaıda, ádep jónindegi keńestiń músheleri basyn qatty bastaǵanymen M.Jumabaev aýdany Aleksandrovka aýyldyq okrýginiń ákimi Qaıyrgeldi Baıtaqovtyń máselesin maıshammen qaraýǵa kelgen kezde solqyldaqtyqqa boı aldyrǵandaı boldy. Sirá onyń syra ǵana ishken edim degen «ýáj» kóńilderin bosatyp jiberse kerek. Sheshim qabyldanarda pikir ekige jaryldy. Departament jetekshisi – ádep keńesiniń tóraǵasy Ǵ.Tursynbaevtyń jumys kezinde ishimdikke salynǵandar qatań jazalanyp, jumystan bosatylýy tıis degen usynysyna ózgeleri ulardaı shýlap, qatań sógis jarııalansyn dep jer tabandap otyryp aldy. Osylaısha «qyryq kisi – bir jaq, qyńyr kisi – bir jaq» degen máteldiń óńi aınalyp shyǵa keldi.
Buǵan deıin Sergeevka qalasynyń ákimi, Aıyrtaý aýdany dene shynyqtyrý jáne sport bóliminiń jetekshisi, Petropavl qalalyq ákimdiginiń apparat basshysy, Shal aqyn aýdanyndaǵy Semıpolka aýyldyq okrýginiń ákimi «aqmaǵambetpen» býyn bosatyp, kólikpen jelshe júıtkigenderi úshin biri qyzmetten bosap, biri óz erkimen ketkenderin eskersek, jaza qoldanýda kimniń durys, kimniń burys ekenin ar-uıattyń enshisine qaldyraıyq.
Aıtyp-aıtpaı ne kerek, abyroı-bedeli joǵary, qyzmetinen at úrketin maqtaýly basshy qalyń qoldy basqarýdan shettetilgen qolbasydaı jer shuqyp qaldy.
О́mir ESQALI,
«Egemen Qazaqstan»
Soltústik Qazaqstan oblysy
