E. Birtanov osy jyldyń toǵyz aıynyń qorytyndysy boıynsha jalpy ólim (2%-ǵa deıin tómendedi), bala ólimi (10,2% tómendedi), ana ólimi (4,9%-ǵa), qaterli isikterden bolǵan ólim (4,9%-ǵa), jazataıym oqıǵalar men jaraqattan (9,1%-ǵa), týberkýlezden (17,1%-ǵa) bolǵan ólim kórsetkishinde ótken jyldyń kezeńimen salystyrǵanda oń qarqyn saqtalyp otyrǵanyn aıtty.
Sonymen qatar mınıstr Densaýlyq saqtaý salasyn damytýdyń memlekettik baǵdarlamasyn iske asyrýdyń negizgi baǵyttary týraly málimdedi. Qoǵamdyq densaýlyq saqtaý qyzmeti ashyldy, 11 aımaqta densaýlyq saqtaý basqarmalary janynan qoǵamdyq densaýlyq saqtaý bólimderi quryldy.
MSAK deńgeıinde alty jasqa deıingi balalarǵa kórsetiletin medısınalyq qyzmet sapasyn jaqsartý jáne jalpy praktıka dárigeriniń júktemesin tómendetý maqsatynda pedıatrııalyq ýchaskelerdi qaıta qalpyna keltirý jumystary júrgizilýde. Jalpy bıyl respýblıka boıynsha 23 pedıatrııalyq ýchaske ashyldy, jyl sońyna deıin taǵy 84 osyndaı ýchaske ashý josparlanyp otyr. 2018 jyly oqýdy bitiretin ıntern pedıatrlardy esepke alǵanda, taǵy 230 pedıatrııalyq ýchaske ashý, 2019 jyldan bastap 2024 jyl aralyǵynda jyl saıyn 500-den astam pedıatrııalyq ýchaske ashý kózdelgen. Osylaısha, 2024 jylǵa qaraı pedıatrııalyq ýchaskelerge degen qajettilikti 100% qamtamasyz etý josparlanyp otyr.
Budan ózge, sozylmaly aýrýlarmen aýyratyn pasıentterdi belsendi túrde qadaǵalap-qaraýǵa negizdelgen aýrýlardy basqarý baǵdarlamasyn engizý boıynsha joba júzege asyrylýda. Bıyl joba barlyq 16 óńirde iske asyryldy, jobaǵa qatysatyn naýqastardyń sany eki esege ulǵaıdy.
Jedel medısınalyq kómek kórsetýdi jetildirý jáne JMK qyzmetiniń jumysyndaǵy problemalardy sheshý maqsatynda jedel jáne kezek kúttirmeıtin medısınalyq kómek kórsetýge saralanǵan tásildi kózdeıdi. Jedeldik sanatyna baılanysty kómekter ońtaılandyrylǵan jáne sımptomdary boıynsha toptastyrylǵan.
Qabyldaý bólimsheleriniń deńgeıinde qabyldaý bólimshesiniń dárigeri («emergency doctor») degen jańa dáriger mamandyǵy engiziletin bolady, ol shuǵyl medısınalyq kómekti der ýaqytynda kórsetip, qajet bolǵan jaǵdaıda bastapqy reanımasııalyq jáne basqa da sharalardy pasıenttiń jaǵdaıy turaqtalǵanǵa deıin júrgizetin bolady.
Ulttyq dári-dármek saıasatyn iske asyrý aıasynda búginde 53 uzaqmerzimdi shart jasaldy, onyń ishinde 24-ine bıyl qol qoıyldy. Biryńǵaı dıstrıbıýtordyń jalpy satyp alýynda otandyq óndirýshilerdiń úlesi naqty máninde 75%-dy, aqshalaı máninde 30%-dy qurady. Dári-dármekterdiń 175 ataýyna 23%-ǵa baǵa tómendetildi. Ambýlatorııalyq deńgeıde shamamen 2,5 mln naýqas dári-dármektermen qamtamasyz etildi, 2018 jyly 3,8 mln naýqasty qamtamasyz etý kózdelgen.
Mindetti medısınalyq saqtandyrý júıesin engizý salasynda 2017 jyldyń 1 shildesinen bastap jumys berýshilerdiń aýdarymdary jáne jeke kásipkerlerdiń jarna tóleýi bastaldy. Jeke jetkizýshiler úshin kedergilerdi joıý maqsatynda 2018 jylǵa medısınalyq qyzmetterdi satyp alý boıynsha sharalar júrgizilýde. Densaýlyq saqtaý sýbektileriniń málimetter bazasy qalyptastyryldy – 1 519, onyń ishinde jeke jetkizýshiler sany – 686.
Sonymen qatar mınıstrlik óńirlermen birlesip Densaýlyq saqtaý salasynyń ınfraqurylymyn damytýdyń biryńǵaı perspektıvalyq josparyn ázirleýde, onda jelini transformasııalaý qajettiligi, ınfraqurylymdy jańartý jáne resýrstardy tıimdi paıdalanýdy eskerýmen medısınalyq kadrlardy daıyndaý qarastyrylady.
Qazirgi tańda jeti óńirdiń ınfraqurylymyn damytýdyń uzaqmerzimdi josparlary qarastyryldy (Aqtóbe, Atyraý, Jambyl, Batys Qazaqstan, Qaraǵandy, Mańǵystaý oblystary jáne Astana qalasy). Jalpy, ınvestısııalyq josparlarmen birge Biryńǵaı perspektıvalyq jospar boıynsha jumysty osy jyldyń qarasha aıynyń birinshi onkúndiginde aıaqtaý josparlanyp otyr.
Infraqurylymdy damytýdyń biryńǵaı perspektıvalyq josparyn qabyldaý jáne iske asyrý 2017-2025 jyldar aralyǵynda 11,2 mlrd teńge kóleminde qarajat únemdeýge múmkindik beredi dep boljanǵan.
Professorlyq-oqytýshylyq quramynyń biliktilik deńgeıin arttyrý maqsatynda Qaraǵandy memlekettik medısına ýnıversıtetiniń bazasynda Innovasııalyq tehnologııalar transferti ortalyǵy quryldy, oqytýshylardyń áleýetin odan ári arttyrý jospary ázirlendi, daıarlaý jáne biliktilikti arttyrý baǵdarlamalary qaıta qaraldy.
Medısınalyq JOO-lar men sheteldiń úzdik ýnıversıtetteriniń arasynda strategııalyq áriptestiktiń ekinshi kezeńi iske asyrylyp jatqany atalyp ótti. Basqarý pozısııasyna jáne kafedra professorlary retinde Shvesııa, Fransııa, Polsha, Italııa, Túrkııa elderinen jeti shetel mamany tartyldy. 2017 jyldyń sońyna deıin taǵy úsh mamandy tartý josparlanǵan.
Barlyq mamandyqtar boıynsha medısına kadrlaryn daıarlaýdyń jańa standarttary bekitildi.
Sondaı-aq, QR densaýlyq saqtaý mınıstri densaýlyq saqtaý salasyn sıfrlyq jańǵyrtý jáne qaǵazsyz jumys formatyna kóshý maqsatynda medısınalyq aqparattyq júıeler (MAJ) engizilip jatqanyn málimdedi.
Búgingi tańda MAJ-ben respýblıka boıynsha densaýlyq saqtaý uıymdarynyń 45% qamtylǵan. Respýblıkalyq uıymdardyń MAJ-ben qamtylýy – 26%. Jyl sońyna deıin MAJ-dardy barlyq respýblıkalyq uıymdarǵa engizý josparlanyp otyr, aımaqtarda - 64% deıin.
Qaraǵandy, Aqmola jáne Qostanaı oblystarynda 2018 jyldan bastap medısınalyq qujattamany qaǵazsyz júrgizýge kóshý jónindegi pılottyq jobany engizý josparlanyp otyr. 2017 jyldyń birinshi jartyjyldyǵynyń qorytyndysy boıynsha densaýlyq saqtaý uıymdaryn kompıýterlik tehnıkamen jabdyqtaý respýblıka boıynsha orta eseppen 74,4%-dy qurady, 2017 jyldyń basynda bul kórsetkish 34,3 %-dy quraǵan edi.
Respýblıkanyń medısına uıymdarynyń 53%-yna ınternet jelisi qoljetimdi, atalǵan kórsetkish jyl basynda 47%-dy quraǵan. 2020 jylǵa qaraı ADA (aýyldyq dárigerlik ambýlatorııa) deńgeıine deıin barlyq medısınalyq uıymdar ınternet jelisine qosylady.
