Jıynnyń basynda Densaýlyq saqtaý vıse-mınıstri Lázzat Aqtaeva elimizdiń Memlekettik hatshysy Gúlshara Ábdiqalyqovanyń forým qatysýshylaryna joldaǵan quttyqtaýhatyn oqyp berdi. «Ulttyń densaýlyǵyn nyǵaıtý – memleketimizdiń basty saıasatynyń biri. Búginde elimizde medısına salasyn damytýdyń «Densaýlyq» baǵdarlamasy sátti júzege asyrylyp keledi. Bul baǵdarlamanyń basty maqsaty – densaýlyq saqtaý salasyn ilgeriletip, halyqtyń ómir súrý jasyn uzartý. Jahandaný, sıfrlandyrý jáne tehnıkalyq progrestiń qarqyndy damyǵan zamanynda barlyq sala zamanǵa saı keshendi órkendeý kerek. Bul radıologııa salasyna da qatysty. Qazirgi tańda usaq detalderdiń ózin anyq ári sapaly kórsetetin, aǵzadaǵy morfologııalyq ózgeristerdi erte bastan anyqtaýǵa múmkindik beretin ınnovasııalyq qondyrǵylar shyǵyp jatyr. Medısınanyń mundaı ozyq jetistikterin elimizge de engizip, sáýleli dıagnostıka salasynyń eń joǵary tásilderin meńgere bilýimiz kerek. Búgingi forým qazaqstandyq mamandar úshin úlken tájirıbe alańyna aınalatynyna senimdimin», delingen quttyqtaýhatta.
Radıologtardyń Eýrazııalyq forýmyna álemniń 25 elinen 350-deı delegat kelipti. Eki kúnge jalǵasatyn alqaly jıynda sáýleli dıagnostıka salasyndaǵy jańa tehnologııalar men emdeýdiń sońǵy tásilderi sóz bolyp, jas mamandarǵa bilikti ǵalymdar sheberlik dárisin ótkizbek.
Vıse-mınıstrdiń málimeti boıynsha, búginde elimizde 933 rentgenolog, 450 kompıýterlik tomografııa mamany, 1500 ÝZI dárigeri, 40 ıadrolyq medısına mamany, 30 dástúrli emes rentgen-hırýrg bar eken. Mamandardyń aıtýynsha, Qazaqstannyń sáýleli dıagnostıka salasynyń damý qarqyny basqa elderdiń jaǵdaıynan esh kem emes. 2012 jyldan beri Qazaqstan – eýropalyq radıologtar qoǵamynyń tolyq quqyly múshesi. Bul degenińiz bizdiń mamandar jyl saıyn álemniń eń myqty ǵalym-dárigerlerdiń dáristerinen ótip, biliktiligin shyńdap, osy saladaǵy eń sońǵy emdeý tásilderin ıgerip turady degen sóz. Eýropalyq radıologtar qoǵamynyń eń kóp – eki aptalyq kýrsy Qazaqstanda ótkiziledi eken. Degenmen de, elimizde radıolog-mamandardy daıyndaý jaǵynan másele bar. Mysaly, Amerıkada, Eýropa elderinde sáýleli dıagnostıka mamandaryn kemi bes jyl oqytady eken. Al Qazaqstanda – eki jyl. «Bul – radıolog-mamandaryn daıarlaý úshin tym az ýaqyt. Sondyqtan keleshekte kadrlar daıyndaý máselesin qaıta qaramaq oıymyz bar. Bizdiń oıymyzsha, endi bir 5-10 jylda elimizde sáýleli dıagnostıka salasynyń eń myqty mamandar shoǵyry qalyptasatyn bolady», deıdi Qazaqstan radıologtar qoǵamynyń vıse-prezıdenti Taırhan Daýtov.
Osymen jetinshi ret ótkizilip otyrǵan radıologtardyń Eýrazııalyq forýmy belgili ǵalym, elimizdiń radıologııa salasyna súbeli úles qosqan tulǵa Janǵalı Hamzabaevtyń rýhyna jáne qazaqstandyq radıologtar qoǵamynyń 40 jyldyǵyna arnaldy.
Qymbat TOQTAMURAT,
«Egemen Qazaqstan»
