Elimizdegi aýdan ortalyqtaryn aıtpaǵanda qaı jaǵynan alyp qarasaq ta, qaısybir qalalarymyzdan bir bas joǵary turatyn bul aýyldyq okrýg respýblıkamyzǵa keńinen tanylǵany belgili. Áleýmettik máselelerdiń bári de tolyǵymen sheshilip, áleýeti artqan atalmysh aýylǵa otyz jyldan beri Ivan Saýer jetekshilik etip keledi. Memleket basshysynyń ózi jıi kelip turatyn Rodınadanyń búgingi sanaty «aýyldyq okrýg» bolǵanymen, bul jerde ómir súrý sapasy qaladaǵydaı. Munda árbir úıdiń aýlasyna deıin asfalt tóselip, kóshesi bıýdjet qarajatynsyz tolyq jaryqtandyrylǵan, balabaqshasy tegin, zamanaýı talapqa saı kitaphanasy men mádenıet úıiniń qyzmeti úılesim tapqan aýyl turǵyndarynyń barlyǵy da 100 paıyzdyq kórsetkishpen jumysqa tartylǵan. Mine, sondyqtan da bul aýyldy ózgelerge úlgi etip, ónegesin ózgeler alsa deımiz.
«Biz bul aýyldaǵy áleýmettik máselelerdiń tıimdi sheshilýine jiti kóńil bólip, etene tanysý úshin kelip turmyz. Qoldanystaǵy zańdarymyzdyń sheńberinde azamattardyń ómir súrý qaǵıdasyn qalaı jaqsartýǵa bolatyndyǵyn kózben kórip, qalyń elge úlgi bolarlyq osyndaı dúnıelerdi jarqyratyp kórsetkimiz keledi. Bul Elbasymyzdyń «Rýhanı jańǵyrý» baǵdarlamalyq maqalasynda naqtylanǵan talaptarǵa saı júzege asyrýǵa turarlyq joba ekeni sózsiz. Elimizdiń árbir azamaty óz týǵan jerine osylaısha aq adal nıetpen qyzmet etse, Qazaqstannyń árbir aýyly keremet kórkeıgen bolar edi», dedi V.Bojko.
Uzaq jyldar boıy tynymsyz eńbek etip, aýyldy búgingideı kúıge jetkizgen Rodınanyń dırektory Ivan Saýer de depýtattardyń bul sapary turǵyndardyń áleýmettik máseleleriniń sheshilý jolyna tereńirek úńilýge baǵyttalǵanyn aıtady.
«Bizdiń aýylymyzda da sheshimin tabýdy qajet etetin keıbir máseleler barshylyq. Desek te, qazirgi jaǵdaıymyzdy ózgelerge úlgi retinde uıalmaı kórete alamyz. Bilim berý men densaýlyq saqtaý, mádenıet pen sporttan bólek, áleýmettik-turmystyq túıtkilder túgel derlik usaq-túıegine deıin taqlylaýdan ótip, sheshimin tapqan. Prezıdent jarııalaǵan «Týǵan jer» baǵdarlamasy aıasynda bıyldyń ózinde 30 mln teńgege aýyldyq emhana qyzmetin qaıta jańǵyrttyq. Aýyl irgesinen jańadan 28 kottedj salý arqyly «Jastar» dep atalatyn shaǵyn qalashyq ashyp, turǵyndardyń baspana máselesin túpkilikti sheshtik. Munyń bári de memlekettiń bizge birgen múmkindikteriniń nátıjesi. Tek, jospardy júıelep, isti úılestire alsań bolǵany», deıdi aýyldyq okrýgtyń dırektory.
I.Saýer depýtattardy óz jumysynyń nátıjelerimen tanystyra júrip, aýyldy kórkeıtýge qatysty zańnamalyq turǵyda kóptegen máseleler men birqatar qıyndyq, kedergilerdiń bar ekendigin baıandady.
«Mysaly, kóptegen aýyl-aımaqtardy damytýǵa bólinetin qarajat kólemi bıýdjetke tólenetin salyq kólemimen baılanystyrylmaıtyndyǵy bizdiń janymyzǵa batady. Sol sııaqty jergilikti turǵyndar sany 2 myńnan asatyn aýyldarǵa jeke bıýdjetiniń bolýyn qamtamasyz etetin ereje synaq retinde qoldanysqa endi. О́z basym bul ádiletsiz sheshim dep sanaımyn. Eger osy erejege súıensek, qansha jerden salyqtyq tólemder arqyly bıýdjetke qomaqty qarjy quıǵanymyzben, bizdiń aýylǵa jeke bıýdjetke ıe bolý quqy berilmeıdi. Sebebi, aýyl turǵyndarynyń sany – 1 735. Iаǵnı, 2 myńǵa jetpeıdi. Sonymen qatar, «Jeke qosalqy sharýashylyq týraly» zań jobasynyń da keıbir máseleleri bar. Veterınarlyq sharýashylyqqa qatysty zańdarymyzdy da túpkilikti ózgertýdi qajet etedi. Eger biz Memleket basshysy baǵytymyzdy aıqyndap bergendeı aýyl-aımaqtarymyzdy damytqymyz kelse, zańdarymyzda kórinis beretin kemshin tustaryn tolyqtyryp, jetildirýimiz kerek», dedi I.Saýer.
Sharýashylyq basynda depýtattarmen órbigen áńgime arasynda sharýa qojalyqtaryna memleket tarapynan beriletin sýbsıdııa máselesi de sóz boldy. Ásirese, el Úkimetiniń qoldaýymen óz jerimizde ónim óndirip, onysyn syrtqy naryqqa shyǵarý arqyly tabysyn eseleýge beıim kásiporyndardyń qyzmetine memlekettik qoldaýdy toqtatý jaıy aıtyldy. Al óz kezeginde sóz alǵan halyq qalaýlylary zańda bekitilgen tártippen jumys isteý barysynda tájirıbeden týyndaıtyn keıbir qaıshylyqtardyń bar ekendigin joqqa shyǵara almady. Sóıtip, sharýalar men depýtattar mundaı olqylyqtardyń ornyn toltyrý maqsatynda aldaǵy ýaqytta tıisti deńgeıde birlese jumys isteıtin bolyp ýaǵdalasyp, tarqaty.
Nurlybek DOSYBAI,
«Egemen Qazaqstan»
