Soǵan oraı qazir «Eńbek» beketin aýystyrý jumystary júrgizilýde. Bul ken jumystaryn damytýdyń keleshek baǵyty bolyp sanalady. Kólik joldary syzbasyn qaıta qurýdyń aýqymdy jobasy atalǵan beketti kóshirý qajettiligin talap etedi. Ken qoımalaryn karerdiń «Iýjnyı» betkeıine jyljytý jáne bekettiń temirjol joldaryn bólshekteý júrgizilýde.
«Mundaı túrlendirýler karer ónimdiligin aıtarlyqtaı arttyrýy tıis. Jańa oryndaǵy «Eńbek» beketiniń eki tıeý tuıyqtary iske qosyldy, kelesi ekeýiniń de 50 paıyzy daıyn. Bes shaqyrym temirjoldyń teń jartysy tóseldi, jeti baǵyttamaly burmalardyń tórteýi jumys istep tur» dep naqtylady «SSKО́B» AQ jol sharýashylyǵy jáne ǵımarattar basqarmasy bas ınjeneriniń kúrdeli qurylys jáne kúrdeli jóndeý jónindegi orynbasary Sergeı Vılgelm.
Tıimdiliktiń naqty kórsetkishteri beket tolyq qýatyna kóterilgende belgili bolady jáne sonda ǵana ózgeristiń tıimdiligin baǵalaýǵa bolady. Kenishtegi bul ózgerister jıekterdi tómendetý arqyly Qashar kareriniń «Severnyı» jáne «Vostochnyı» betkeıleriniń kentasty aımaǵyn damytýǵa, kertpeshterdi, qaýipsizdik bermalaryn jobalyq normatıvterge keltirýge jaǵdaı jasaıdy jáne kendi arshý men daıyndaýdy qamtamasyz etedi. Temirjoldaryn tolyq túrlendirgennen keıin poıyzdar qozǵalysynyń baǵyty qysqarady, kendi jetkizýge ketetin ýaqyt únemdeledi.
Názıra Járimbet,
«Egemen Qazaqstan»
Qostanaı oblysy, Rýdnyı qalasy
