Sonymen qatar, jergilikti sýretshilerdiń jumystarynan jasaqtalǵan jáne etnomádenı birlestiginiń qoldanbaly shyǵarmashylyq kórmesi uıymdastyryldy, dep habarlady Mańǵystaý oblysy ákiminiń baspasóz qyzmeti egemen.kz tilshisine.
1937 jyldary 100 myńdaı qıyr shyǵys káristeri elimizdiń ár aımaǵyna jer aýdarylǵan bolatyn. Joldan ábden qajyp, qaljyraǵan koreı ultyn qazaqtar bolmysyna saı qushaǵyn aıqara ashyp, emin-jarqyn kóńil kúımen qarsy aldy.
Qanshama qaıǵy-qasiret pen qýǵyn-súrgindi basynan ótkergen qazaq halqy taǵdyrlas koreı halqynyń jan batpanyn tereńinen túsinip, baýyryna basty. Búginde oblysymyzda 800-den astam káris ultynyń ókili tatý-tátti ómir súrýde. Bul - eki eldiń ózara yntymaqtastyǵy men birliginiń belgisi.
Káris ultynyń perzentteri óńirdiń jáne elimizdiń áleýmettik-ekonomıkalyq damýyna ár salada ólsheýsiz úles qosyp keledi. Mysaly, Mańǵystaýda Aqtaý qalasynyń Qurmetti azamaty, QR eńbek sińirgen qarjygeri, káris etno-mádenı birlestiginiń negizin qalaýshylardyń biri Pak Andreı Pondıýnovıchti, alǵashqy tanymal munaıshy, búginde Teńiz kenornynan 10-15 shaqyrym qashyqtyqtaǵy jańa kenorny «Ogaıskoe» dep esimimen atalǵan Ogaı Kıponı Haksenıevıchti, kúni keshe aramyzdan máńgige ketken oblysymyzdaǵy eń bilimdi, bilikti dáriger, óńir ǵana emes, Qazaqstannyń medısına salasynyń damýyna zor úles qosqan Chagaı Borıs Gısebovıchti qurmetpen ataı alamyz.
О́tkenge kóz júgirtsek, 1989 jyly Aqtaý qalasynda turatyn káristerdiń quryltaı sezi ótip, onda káris ulttyq mádenı ortalyǵy qurylǵan bolatyn. Sodan beri óz jumysyn toqtatpaǵan etnomádenı birlestik qazirgi kúni oblysymyzdyń barlyq sharalaryna belsendi qatysyp júr.
- Búgingi tańda elimizdegi káris ultynyń ókilderi Qazaqstannyń ajyramas bóligine aınaldy. Postkeńestik kezeńdegi basqa elge qonys aýdarýǵa qaramastan, keıbir ulttar Qazaqstanda turaqty ómir súrýdi qalady. Qazaq elin olar óz úıindeı sezindi. Aqtaýdyń qala bolyp qalyptasýyna úlesin qosqan túrli ult ókilderiniń arasynda sizderdiń de oryndaryńyz bir tóbe, - dedi Mańǵystaý oblysynyń ákimi E.Toǵjanov.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy
