Taraz qalasy ákiminiń orynbasary Maqsat Ahaevtyń aıtýynsha, jalpy, qaladaǵy jylý júıesiniń uzyndyǵy 247 473 shaqyrymdy quraıdy eken. Osy ortalyqtandyrylǵan júıege barlyǵy 1202 kóppáterli turǵyn úı qosylǵan. Onyń ishinde 876 nysan «Tarazenergoortalyq», 55-«JGRES» aksıonerlik qoǵamdaryna, 163 nysan «Jambyl jylý», 98 nysan «Temirjol Jylý» memlekettik-kommýnaldyq mekemesine, al 10 nysan «Sofııa» jaýapkershiligi shekteýli seriktestigine qaraıdy. Qala ákimdiginiń málimetinshe, búgingi tańda qaladaǵy turǵyn úıler jylytý maýsymyna túgel daıyn ári pasporttary da ázirlengen.
Negizi jylý óndirýshi jáne ony jetkizýshi mekemeler jylýdy úı nysandarynyń elevatoryna deıin ǵana jetkizip bere alady eken. Al odan ári úıishilik jeliniń ótkizgishtigi men aqaýsyzdyǵyn páter ıeleriniń ózderi júzege asyrýy tıis. «Búginde kóptegen páterlerdegi tik qubyrlar men shoıyn batareıalar aýystyrýdy qajet etedi. Qubyr jelileriniń tozýy, bitelýi jylýdyń bir páterden ekinshi páterge kedergisiz jetýin de qıyndatady. Osyǵan baılanysty týyndaıtyn qıyndyqtar úı aǵalarynyń turaqty nazarynda bolýy tıis», deıdi Maqsat Ahaev.
Jalpy alǵanda, búgingi kúni 105 áleýmettik nysan men 720 kópqabatty turǵyn úı jylýǵa qosylǵan. Qalǵan turǵyn úıler men áleýmettik nysandar 15 qazanǵa deıin jylýǵa qosylatyn bolady.
Hamıt Esaman,
«Egemen Qazaqstan»
Jambyl oblysy
