Oblystyq qoǵamdyq keńestiń kezekti otyrysynda tehnıkalyq jáne kásiptik bilim berýdiń memlekettik tapsyrysyn bekitý, turǵyn úı kómegin taǵaıyndaý, Kókpekti aýdanynyń ákimshilik-aýmaqtyq qurylysyna ózgerister engizý men ózge de normatıvtik quqyqtyq aktilerdiń jobalary talqylandy. Oǵan oblystyq qoǵamdyq keńestiń tóraǵasy Vladımır Golovatıýk pen qoǵamdyq kńestiń músheleri qatysty.
Kókpekti aýdany 17 aýyldyq okrýg pen 56 eldi mekennen turady. Aýdannyń О́rnek, Kamenka, Qyzyl Juldyz, Qarǵaly aýyldarynda halyq óte az qonystanǵan. Osyǵan oraı qoǵamdyq keńes otyrysynda aýdan ákimdigi osy eldi mekenderdiń ákimshilik-aýmaqtyq qurylymyna ózgerister engizý jónindegi usynyspen shyqty. Kókpekti aýdanynyń ekonomıka jáne qarjy bólimi basshysynyń mindetin atqarýshy Azamat Makenovtyń aıtýynsha, Terekti aýyldyq okrýginiń О́rnek aýylynda nebary 22 adam turady, al Kamenkadaǵa halyq sany budan da az. Qyzyl Juldyzda on úı ǵana tútin tútetip otyr. Qarǵaly aýylynyń 21 turǵynynyń úsheýi ǵana ekonomıkalyq belsendi. Atalmysh eldi mekenderde mal sharýashylyǵymen shuǵyldanyp otyrǵan birneshe qojalyqtar bar. Aýyl turǵyndaryna qyzmet kórsetetin áleýmettik nysandar joq. Bul eldi mekenderde óndiristi damytý josparlanbaǵandyqtan bolashaǵy joq dep tanylyp otyr. Keńeste osy aýyldardy taratý jónindegi usynys aıtyldy.
Elimizde turǵyn úıdi ustaý jáne kommýnaldyq qyzmetterge aqy tóleý shyǵyndarynyń shekti deńgeıi otbasynyń jıyntyq tabysynyń 7-20 paıyzy mólsherinen asyp ketken januıalar turǵyn úı kómegin alýǵa quqyǵy bar ekendigi belgili. Bıylǵy jyldyń maýsym aıynda zańnamaǵa birqatar ózgerister engizilip, soǵan oraı turǵyn úı kómegin alýǵa ótinish berý men quzyretti mekemeniń ony júzege asyrý tártibi de ózgerdi. Jıyn barysynda oblystyq jumyspen qamtý jáne áleýmettik baǵdarlamalardy úılestirý basqarmasynyń basshysy Elena Starenkova engizilgen ózgertýlermen tanystyrdy.
Rıdder qalasynan 30 shaqyrym jerde ornalasqan «Lenınogorskıı demalys úıiniń» ataýy Lesnoe aýyly bolyp ózgertildi. Bul jóninde oblystyq tilderdi damytý basqarmasynyń basshysy Aıdyn Shaımardanov málim etti. Demalys úıiniń jańa ataýyn bekitý jónindegi usynys biraýyzdan qabyldandy.
Keńes barysynda qoǵamdyq keńes músheleri tarapynan baıandamashylarǵa suraqtar qoıylyp, usynystar engizildi.
