Atalǵan ortalyq taýar aınalymy kóleminiń ulǵaıýyna jáne elimizdiń kóliktik-tranzıttik áleýetiniń artýyna zor septigin tıgizedi. Búgingi kúnniń suranysyna saı jabdyqtalǵan sý jańa keshende kedendik rásimdeý aýmaǵy da qosymsha jumys isteıdi. Mamandardyń aıtýynsha osyǵan deıin «Qaljat» beketi arqyly kúnine 80 kólik ótse, endi bul kórsetkish shamamen eki esege deıin artatyn bolady. О́ıtkeni budan bylaı ortalyq jumysy bir tereze qaǵıdasy boıynsha jumys isteıdi. Sonymen qatar «Astana-1» aqparattyq júıesiniń «tranzıt» modýli de iske qosylǵan. Osy júıeniń kómegimen aqparatty bergen sátten bastap, taýarlardy rásimdep bitkenge deıingi barlyq prosessterge avtomattandyrylǵan baqylaý ornatylady. Bul óz kezeginde otandyq kásipkerler men syrtqy ekonomıkalyq áriptester úshin qolaıly jaǵdaı týdyrmaq.
Sáýleti jarasqan zamanaýı ortalyqtyń saltanatty ashylý rásimine Memlekettik kirister komıteti tóraǵasynyń orynbasary Gosman Amrın bastaǵan jaýapty tulǵalarmen qatar elimiz ben kórshi elderdiń bıznes ókilderi qatysyp ortalyqtyń el damýyna tıgizer paıdasy jaıly keńinen aıtty.
– Logıstıka uǵymy – júk tasymaldaýdy uıymdastyrýshy ǵana emes taýardy jóneltýshi men qabyldap alýshyny baılanystyratyn altyn kópir. Elbasynyń Qazaqstan halqyna joldaǵan Joldaýynda, Ult jospary – «100 naqty qadamynda» logıstıka salasynyń qarqyndy damýyna aparatyn negizgi baǵyttar men basymdyqtar taıǵa tańba basqandaı anyq kórsetilgen. Aldaǵy ýaqytta bul ortalyq el ıgiligine jumys istep, qos taraptyń arasyndaǵy barys-kelis pen alys-beristi arttyra otyryp kóptegen oń ózgeristerge jol ashatyn bolady. Elimizdiń ekonomıkalyq qýatynyń artýy, kóptegen azamattarǵa jańa jumys ornyn berý arqyly halyqtyń ál-aýqatynyń kóterilýi, tranzıttik potensıaldyń tıimdiligin ósirý jáne syrtqy ekonomıkalyq qyzmetke qatysýshylarǵa qolaıly jaǵdaı jasaý ortalyqtyń negizgi mindeti. Egemendik alǵan eńseli jyldar ishinde Elbasymyzdyń bastamasymen elimizdegi keden salasynyń jańasha turpatta damýyna kóp kóńil bólinýde. Búgingi ashylyp otyrǵan keden-logıstıkalyq ortalyq osynyń dáleli – deıdi «Qaljat» ótkizý beketiniń basshysy Álim Jýsanbaı.
Jaýapty mamandar kólik-logıstıka ortalyqtarynyń bútindeı bir kesheni qurylysynyń aıaqtalýy shekaradaǵy logıstıkalyq ınfraqurylymnyń tıimdiligin tolyq sheshe alatynyn aıtady. Eske salsaq, jańa ortalyqtyń qurylysy memlekettik-jekemenshik áriptestik negizinde salynǵan.
Taýar jáne kólik aǵynyn óńdeýge, sondaı-aq júkterdi kedendik óńdeýden ótkizýge qatysty qyzmetterdi qamtamasyz etip otyrǵan «Qaljat», «Bahty», «Dostyq», «Horgos», «Altynkól» jáne «Maıqapshaǵaı» pýnkteri Qazaqstandy ǵalamdyq kólik-logıstıka júıesimen biriktirýge múmkindik beredi. Osylaısha, bolashaqta otandyq shekara mańyndaǵy kólik-logıstıka ınfraqurylymyn damytý isi Eýrazııanyń eń iri logıstıka júıesin qurýǵa alyp kelmek.
Arman OKTIаBR,
«Egemen Qazaqstan»
QALJAT-ALMATY
