Esterińizde bolsa, bul jóninde 2012 jyly Elbasynyń halyqqa Joldaýynda da qozǵalǵan bolatyn. Endigi kezekte Prezıdentimiz latyn álipbıine kóshýdiń naqty joldaryn aıtyp, osy másele zııaly qaýym arasynda keńinen talqylanýy qajet ekenin alǵa tartty. Sondyqtan, kún taqyrybynda ótkir turǵan, búginde qoǵamda qyzý talqylanyp jatqan latyn álipbıine kóshý máselesine baılanysty oı qozǵaýdy jón kórdim.
Tarıhtan belgili, ótken ǵasyrdyń 30-40 jyldary latyn álipbıi elimizde qarip retinde qoldanysta boldy. Sol jyldary ǵylym-bilim týyndylary, jalpy is-qaǵazdar latyn álipbıi negizinde júrgizildi. Meniń ákem – Uly Otan soǵysynyń ardageri. Ákemniń maıdan dalasynan týǵan-týys, baýyrlaryna latyn qarpimen jazǵan hattary áli kúnge deıin saqtaýly. Mine, osynyń ózi sol bir jyldary latyn qarpiniń keńinen qoldanǵanyn ańǵartsa kerek.
Jýyrda aýyldyq okrýg ákimi apparatynda aǵa býyn jáne jastardyń qatysýymen ótken jıynda osy másele qyzý talqylanyp, oı-pikirlerimizdi ortaǵa saldyq. Basqosýda oıy bir jerden shyqqan jastardyń «jańarý jazýdan bastalady» degen sózine razy boldym. Iá, latyn álipbıine kóshý – bir kúnde sheshiletin másele emes. Ýaqyt óte kele bári ret-retimen óz júıesin taýyp, qoldanysqa enetinine senimdimin. Sebebi, latyn qarpi táýelsiz memleketimizdiń ósip-órkendeýine, otandyq ǵylym-bilim salasynyń damýyna orasan yqpal etetini anyq.
Qoryta aıtqanda, eldigimiz ben egemendigimizdi aıqyndaıtyn ıgi bastamany qazaq eli biraýyzdan qoldaıtynyna kámil senemin.
Alpysbaı JUMAHANOV,
Jambyl aýdandyq Qoǵamdyq keńes tóraǵasy, «Pıoner» óndiristik
kooperatıviniń basshysy
Jambyl oblysy
