Áne, anaý kisige qarańyzshy; bilimdi, aqyldy, aýqatty. Bir sózben aıtqanda, eshkimge kúni túsip turǵan joq. Biraq, baryn salyp, mereıtoı ıesin ótirik maqtap jatyr.
Ne úshin?..
Dastarqany úshin be? Joq. Qoryqqandyqtan ba? Qudaı saqtasyn. Syılaǵandyqtan ba...
Mine, gáp sonda. Sebebi siz álgi «Ne úshin?» degen suraqty tótesinen qoıa qalsańyz, onyń qysylyp, qyzaraqtap, bir-eki aýyz ázilmen qutylý úshin umtylatyn jaǵalaýy da osy.
Áıtpese, onyń qandaı jolmen baıyǵanyn, qaıtip karera jasaǵanyn, kimderdiń jolyn keskenin, kimder arqyly kóterilgenin, qysqasy, bárin, bárin biledi. Tipti úıine oralǵan soń, ony maqtaǵan aýzyn shaıyp, arqasynan qaqqan qolyn sabyndap jýyp tastaýy da múmkin.
Biraq, qaıtesiz... Tirshilik «zańy» solaı. Qarym-qatynas soǵan beıimdelgen. Shyndyq baıǵus ishte buıyǵyp qala beredi. Al ótirik kóshe kezip, serýendep, qonaqqa baryp, toı toılap, sharap iship, saıran salyp júre beredi...
Nurǵalı Oraz,
«Egemen Qazaqstan»
