QR halyq ártisi, «Qurmet» ordeniniń ıegeri, búkilodaqtyq oryndaýshylar baıqaýynyń júldegeri, professor Ázıdolla Esqalıev ókinishke qaraı jaqynda dúnıeden ozǵan edi. Biraq «Jaqsynyń aty ólmeıtininiń» aıǵaǵyndaı dúldúl dombyrashynyń izin jalǵaıtyn urpaqtyń baryn osy baıqaý ańǵartty.
Bıyl tórtinshi ret uıymdastyrylyp otyrǵan sharaǵa jıyrmaǵa jýyq dombyrashy qatysty. Al olardyń ónerlerin QR eńbek sińirgen qaıratkeri Aıtjan Toqtaǵan bastaǵan qazylar alqasy baǵalady.
Kúı dodasynyń jabylý saltanatyna qatysqan oblys ákimi Nurlan Noǵaev: «Sońǵy kezderi dombyranyń mártebesi tómendep ketti» deıtinderge búgingi kúı baıqaýy jaýap bolady. Qazaq barda dombyra bar, dombyra barda qazaq bar. Ázıdolla Esqalıev ónerge bir adamdaı qyzmet etti. Bárine óz eńbegimen jetti, ataq pen aqsha suramady. Eń bastysy, halqynyń ystyq yqylasy, el úshin etken eńbeginiń óteýindeı abyroıy bar»,- dep atap ótti.
- Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń sanany jańǵyrtyp, azamattarymyzdyń boıyndaǵy rýhty oıatý, mádenıetke, dástúrge degen qulshynysty arttyrýda máni zor. Osy baǵyttaǵy ister oblysta jarasymdy jalǵasyn taýyp kele jatyr», - degen aımaq basshysy baıqaýdyń bas júldegeri atanǵan D.Núrpeıisova atyndaǵy halyqtyq mýzyka akademııasy, Atyraý mýzyka kolledjiniń oqytýshysy Jánibek Jámıevti marapattap, bir mıllıon teńgeniń sertıfıkatyn tabystady.
Birinshi oryndy Qurmanǵazy atyndaǵy qazaq ulttyq konservatorııasynyń stýdenti Asylbek Dáýletııarov ıelense, ekinshi oryn osy konservatorııanyń stýdenti Aqbóken Temir men D.Núrpeıisova atyndaǵy qazaq halyq aspaptar orkestriniń dombyrashysy Rınat Ǵımyranovqa berildi. Qurmanǵazy atyndaǵy qazaq ulttyq konservatorııasynyń stýdentteri Álibı Nyshan, Ánýar Zınedenov, Áıgerim Netalıevalar úshinshi júldeni bólisti. Baıqaýdyń basqa qatysýshylary da eleýsiz qalmady.
Baqytgúl BABASh,
«Egemen Qazaqstan»
ATYRAÝ.
