«Birinshiden, Sochıda ótken Joǵary Eýrazııalyq ekonomıkalyq keńes otyrysynda Qazaqstan prezıdenti men Qyrǵyz Respýblıkasynyń Premer-Mınıstrimen kelissózder ótkizilgen joq.
S. Isakov myrzanyń jeke paraqshasynda jarııalaǵan sýret boıynsha memleket basshysymen az-kem tildeskenin baıqaýǵa bolady.
Ekinshiden, memleket basshysynyń Qazaqstan Úkimetine shekaraǵa qatysty týyndaǵan saýaldardy alyp tastaý týraly aqpar shyndyqqa janasymsyz. Shyn mánisinde Úkimetke atalǵan suraqqa qatysty úkimetaralyq keńes ótkizý jóninde tapsyrma berildi», delingen baspasóz baıanynda.
Baspasóz qyzmetiniń habarlaýynsha, shekaradan ótýge eshqandaı shekteýler nemese tyıymdar qoıylmaǵan. Sonymen birge, shekaradaǵy operasııanyń basty maqsaty - shekaralas aýmaqtaǵy zańsyz qyzmetti toqtatý, lańkestik, kontrabandalyq jáne basqa da qylmystyq árekettermen aınalysatyn adamdardy anyqtaý, shekara rejımine jáne kóshi-qon zańnamasyna sáıkestigin tekserý.
Aıta keterlik jaıt, Qyrǵyzstannyń Shekara qyzmeti Qyrǵyzstandaǵy prezıdenttik saılaýdy daıyndaý men ótkizý kezeńinde shekaralyq baqylaýdyń keńeıtilgen nusqasyna aýysty.
Qazaqstan Respýblıkasy Premer-Mınıstriniń Baspasóz qyzmeti burmalanǵan aqparattardyń taratylýyna qatysty alańdaýshylyqty resmı túrde bildirip, obektıvti aqparat berý máselesinde kez kelgen BAQ-pen yntymaqtastyqqa ashyq bolýyn rastaıdy.
