Kent saıabaǵynda ártúrli sport qurylǵylary, átkenshekter, syrǵanaǵy men qumsalǵyshy bar zamanaýı balalar oıyn alańy ornatyldy. 324 sharshy metrdi alyp jatqan jańa oıyn alańy aınalasy birneshe kúnde boı kóterip, eski saıabaq jańa reńde túrlenip ketti. Jańa oıyn alańyn jastar men úlkender kórip úlgerdi.
«Balalarymyz úshin óte qýanyshtymyz.El bolashaǵy – búgingi búldirshinderge arnap tamasha syı jasaǵandarǵa erekshe rızashylyǵymyzdy bildiremiz. Oıyn balasy taza aýada kóbirek ýaqyt ótkizeri sózsiz», dedi kent turǵyny Olga Rakıta.
Bul – Eýrazııalyq Toptyń «Týǵan jer – Rodnye goroda» baǵdarlamasy arqasynda kentte paıda bolǵan ekinshi oıyn alańy ekenin aıta ketken abzal. Eki jyl buryn Selınnaıa kóshesinde birinshi oıyn alańy ornatylǵan bolatyn. Ol jobany iske asyrýǵa 2,3 mln. teńge bólingen edi.
Sonymen qatar, bıyl memorandýmǵa sáıkes baǵdarlama aıasynda Lısakovsk tehnıkalyq kolledjine arnaıy jabdyq - LCD paneli men plotteri satyp alyndy. Bul ken basqarmasy úshin mamandar daıarlaıtyn qaladaǵy jalǵyz arnaıy orta oqý orny bolyp tabylady. Oqý jyly basynan-aq kolledjge jetkizilgen jabdyqty pedagogtar synaqtan ótkizip, sabaqta paıdalanyp jatyr.
Názıra Járimbet
«Egemen Qazaqstan»
Lısakov
