– Táýelsizdik jyldarynda Germanııa Qazaqstanǵa 5 mıllıard dollarǵa jýyq ınvestısııa quıdy. Bul rette, onyń 90 paıyzy shıkizattyq emes sektorǵa salynǵanyn atap ótken jón. Bıylǵy 8 aıda elderimiz arasyndaǵy taýar aınalymy 1,5 mıllıard dollarǵa ósti. Sońǵy 5 jyl ishinde Qazaqstanda 19 iri ınvestısııalyq joba iske asyryldy, – dedi Qazaqstan Prezıdenti.
Nursultan Nazarbaev Qazaqstannyń etnosaralyq kelisimdi saqtaý salasynda júrgizip otyrǵan saıasatyna toqtalyp, elimizde turyp jatqan nemis dıasporasyna qoldaý kórsetý jónindegi ózara yntymaqtastyqqa nazar aýdardy.
Qazaqstan Prezıdenti bizdiń elimizde nemis kapıtalynyń qatysýymen iske asyrylyp jatqan jobalarǵa toqtaldy.
– Qazaqstanda búginde nemis kapıtalynyń qatysýymen túrli salada, sonyń ishinde qurylys, kólik, aýyl sharýashylyǵy, óńdeý ónerkásibi salalarynda 900-den astam kásiporyn tabysty jumys isteýde, – dedi Memleket basshysy.
Sonymen qatar, Nursultan Nazarbaev Qazaqstan basty ról atqaratyn Eýrazııalyq kólik dáliziniń áleýetin atap ótti.
– Búginde Qazaqstan arqyly halyqaralyq 5 temir jol jáne 6 avtomobıl joly ótedi. Osylaısha, sizder paıdalana alatyn strategııalyq kólik dálizderi qalyptasyp otyr, – dedi Memleket basshysy.
Qazaqstan Prezıdenti elimizde qolaıly ınvestısııalyq jáne iskerlik ahýaldy qalyptastyrý úshin qabyldanyp jatqan negizgi sharalarǵa toqtaldy.
– Bıznespen aınalysatyndardyń quqyqtaryn qorǵaý qamtamasyz etilip, kásipkerlik salasyndaǵy zańnama jetildirilýde. Byltyr biz Dúnıejúzilik banktiń reıtınginde 35-orynǵa ıe boldyq. Osy jyldyń basynda Qazaqstan Ekonomıkalyq yntymaqtastyq jáne damý uıymynyń ınvestısııalar jónindegi komıtetiniń qaýymdastyrylǵan múshesi bolyp, Halyqaralyq ınvestısııalar deklarasııasyna qosyldy, – dedi Nursultan Nazarbaev.
Memleket basshysy Qazaqstan Respýblıkasynyń Prezıdenti janyndaǵy Sheteldik ınvestorlar keńesiniń jumysyna toqtalyp, elimizde bıznesmender úshin jasalǵan jaǵdaılardy, sonyń ishinde olardyń ınvestısııalyq jobalar boıynsha korporatıvtik salyqtan bosatylatynyn jáne birqatar eldermen vızasyz rejim ornatylǵanyn atap ótti.
Qazaqstan Prezıdenti Germanııa ınvestorlaryn elimizdegi jekeshelendirý úderisiniń úshinshi kezeńine atsalysýǵa, sondaı-aq «Astana» halyqaralyq qarjy ortalyǵymen yntymaqtastyqty belsendi damytýǵa shaqyrdy.
– Káispkerler bıznesin damytyp, ózara tıimdi seriktestikti ilgeriletý úshin barlyq múmkindikti paıdalanýy qajet. Bizdiń búgingi kezdesýimiz áriptestigimizdi nyǵaıta túsetinine senimdimin, – dedi Memleket basshysy.
