– Aldaǵy kezeńde atqarylatyn jumystardyń jospary belgilendi. Elderimizdegi sıfrlandyrý máselesine qatysty perspektıvaly baǵyttardy aıqyndadyq. Qazaqstan, Reseı jáne Belarýs arasynda osy salada birlese jumys júrgizý jóninde ýaǵdalastyqqa qol jetkizildi, – dedi Nursultan Nazarbaev.
Memleket basshysy kelesi jyly Qazaqstanda sıfrlandyrý máseleleri jóninde kezdesý ótkizý josparlanǵanyn aıtty.
Budan bólek, Qazaqstan Prezıdenti germanııalyq bıznesmendermen ótken kezdesýdiń nátıjeleri týraly áńgimeledi. Onda Qazaqstan-Germanııa qarym-qatynastaryn ekonomıkanyń túrli salalary boıynsha ilgeriletý jóninde ýaǵdalastyqqa qol jetkizildi.
Sondaı-aq Nursultan Nazarbaev Vladımır Pýtınmen bolǵan kezdesýdiń mańyzdylyǵyna toqtaldy.
– Reseı men Qazaqstan arasyndaǵy qarym-qatynas eń joǵary deńgeıde. Baıqońyrǵa qatysty baǵdarlamany birlese iske asyrý jóninde ýaǵdalastyq. Sonymen qatar, О́zbekstanǵa munaı qubyryn salý josparlanyp otyr. Sol úshin tıisti jumys atqarylýy kerek,– dedi Qazaqstan Prezıdenti.
Memleket basshysy kelissózder barysynda Eýrazııa kólik dálizin damytýǵa baılanysty Qazaqstannyń kólik-tranzıt áleýetin odan ári paıdalaný máselesi de talqylanǵanyn atap ótti.
