Taıaýda N.Gogol atyndaǵy Qaraǵandy oblystyq ámbebap ǵylymı kitaphanasynda ótken «Kitaphanaǵa latyn álipbıindegi kitap syıla!» aksııasy osy jumystardyń jemisti jalǵasy boldy.
Aksııa aıasynda kitaphana qoryna latyn qarpindegi alǵashqy kitap syılyqqa tabys etildi. Qundy jádiger – 1939 jyly Almaty qalasynyń «Kazahstanskoe ızdatelstvo hýdojestvennoı lıteratýry» baspasynda jaryq kórgen «Batyrlar» degen kitap.
Atalmysh sharaǵa rýhanı baılyqty kelesi urpaqqa mura etip qaldyrý úshin Almaty qalasynan atamekenine degen saǵynyshyn arqalap kelgen kitap ıeleri, belgili ónertanýshy Baıan Barmanqulova men «Áleýmettik mekemelerdiń túlekterin beıimdeý jáne qoldaý ortalyǵy» «Jastar úıi» KMM dırektory Lázzat Shaıkenova jáne Qarqaraly aýdany Qasym aýylynyń mektep dırektory Maqsat Ospanqulov.
Baıan Káribaıqyzy rásim barysynda qatty tolqyp, «Ákeden qalǵan qazyna el ıgiligine jarap jatsa, odan asqan baqyt bar ma?» dep jastardy jalpy kitap oqýǵa shaqyrdy.
Al osy kitaptyń el ıgiligine aınalýyna úlken sebepshi bolǵan Maqsat Zeıneluly atalmysh basylymdy nemere apasynyń 1990 jyly otbasylyq syı retinde ózine usynǵanyn aıtyp, kitaptyń qundylyǵyna saı búgingi kúnge deıin onyń mekteptiń murajaıynda bolǵanyn jetkizdi. Aksııa jaıly estı salysymen kitapty aımaǵymyzdyń bas kitaphanasyna berýge sheshim qabyldap, Almatydaǵy týǵan-týystarymen aqyldasqan. Maqsat Zeınelulynyń sózin Lázzat Shaımuratqyzy da qýattap, «Qaraǵandy halqy endi osy kitapqa qol jetkizetini bizdi úlken qýanyshqa bóleıdi», dedi.
Atadan qalǵan asyl qazyna oblystyq kitaphananyń «Sırek jáne qundy kitaptar» qoryn tolyqtyryp, latyn álipbıindegi kitap qorynyń alǵashqy kirpishin qalady desek, artyq emes.
Osy keshke Káribaı Barmanqulovtyń tálimgeri, búgingi kúni zeınetker Nurbaný Byhına arnaıy kelip, Qyzdar memlekettik ýnıversıtetinde óziniń ustazy bolǵan Káribaı Barmanqulov jaıly biraz estelikter aıtty.
Al «Bolashaq» akademııasynyń qazaq tili jáne ádebıeti kafedrasynyń meńgerýshisi Qurmanǵazy Sembıev bolsa «Batyrlar» kitabynyń óz stýdentterine bilim berýde úlken kómekshi qural ekenin qýanyshpen habarlady.
Kitaphana qory qundy kitappen tolyqty. Kitaphanashylar qaýymy «bul ıgi is – bastamanyń tek baspaldaǵy ǵana» dep senimmen aıtyp otyr.
Mıras ASAN,
«Egemen Qazaqstan»
Qaraǵandy oblysy
